Inskenoi rrëmbimin për të mos shkuar në punë, nuk ia mori mendja se do t’i kushtojë shtrenjtë – policia në Arizona zbuloi të vërtetën

Një i ri nga Arizona është futur në probleme, pasi kishte inskenuar rrëmbimin e tij për të shmangur shkuarjen në punë.

Policia kishte pranuar një telefonatë për një burrë, që qëndronte i shtrirë në rrugë më duar të lidhur prapa shpinës, transmeton Telegrafi.

Aty menjëherë u dërgua një patrullë që e konfirmoi se bëhet fjalë për një të ri që e kishin gjetur të lidhur.

“Viktima” është identifikuar si Brandon Sols, 19-vjeçar i cili policisë i tha se është rrëmbyer nga dy meshkuj të maskuar.

Sipas tij, ata e kishin goditur në kokë ku si pasojë ka humbur vetëdijen dhe është zgjuar aty ku policia e kishte gjetur.

Por, këtu nuk kishte asgjë të vërtetë. Policia ka konfirmuar se rrëfimi i tij ishte trilluar dhe se nuk kishte ndodhur kurrfarë rrëmbimi apo sulmi.

Pas marrjes në pyetje, i riu në fund ka pranuar se e kishte trilluar tërë këtë rrëfim. Tha se nuk kishte dashur të shkoj në punë, kështu kishte vendosur ta inskenoj rrëmbimin.

Kishte futur një faculetë të rrudhur në gojë, më pas kishte lidhur duart pas shpinës. Kishte qëndruar i shtrirë në rrugë ku kanë mundur ta vërejnë lehtë dhe kishte pritur që ta “shpëtojë” policia.

Pas disa ditëve, Sols u arrestua për shkak të deklarimeve të rreme në polici. Megjithatë, me të kuptuar për historinë e tij, kompania ku ai punonte e shkarkoi menjëherë. /Telegrafi/