Aprovohet kërkesa e Bordit të SHSKUK-së, shtyhet ekzekutimi i Vendimit të Inspektoratit të Punës për Basri Sejdiun

Gjykata Themelore në Prishtinë ka aprovuar kërkesën e Bordit Drejtues, duke shtyrë kështu ekzekutimin e Vendimit të Inspektoratit të Punës për rastin e Basri Sejdiut.

Bordi Drejtues i Shërbimit Spitalor Klinik dhe Universitar të Kosovës, ka pranuar nga Gjykata Themelore në Prishtinë, Aktvendimin A.nr.1690/2020, përmes së cilit është njoftuar se është aprovuar kërkesa e Bordit Drejtues të ShSKUK-së, për shtyrje të ekzekutimit të Vendimit të Inspektoratit të Punës, me nr. 7389 të datës 05.10.2020,  për kthim në punë të ish-drejtorit të përgjithshëm të ShSKUK-së, Basri Sejdiu, deri në vendimin definitiv gjyqësor, sipas padisë së bërë nga Bordi Drejtues i ShSKUK-së.

Lexo po ashtu Inspektorati vendosi kthimin e tij në krye të SHSKUK-së, Basri Sejdiu bënë akuza për menaxhimin e pandemisë në muajin e fundit

“Bordi Drejtues i SHSKUK, edhe njëherë shprehë bindjen se Vendimi për shkarkim të ish-drejtorit të përgjithshëm të ShSKUK-së, është i drejtë dhe i bazuar”, thuhet në njoftimin e QKUK-së.

Ndryshe, pas shkarkimit të Basri Sejdiut, Inspektorati i Punës e ka vlerësuar si të padrejtë shkarkimin e Sejdiut nga pozita e drejtorit të Shërbimit Spitalor dhe Klinik Universitar të Kosovës. /Telegrafi/