Izraeli kërcënohet nga hakerët, qindra faqe interneti u hakuan të enjten

Qindra faqe të internetit izraelite u hakuan të enjten dhe kanë vendosur një video kërcënuese kundër shtetit hebre, duke njoftuar shkatërrimin e saj të ardhshëm.

Sulmi në internet i atribuohet grupit “Hacker of Saviour”, sipas mesazhit të lënë në faqet. Sipas Jerusalem Post, qindra portale u sulmuan, ndërsa gazeta Haaretz raporton se faqet e prekura numërohen në mijëra, dhe kjo për mungesë të një bilanci zyrtar, transmeton Telegrafi.

Sidoqoftë, specialistët treguan se sulmi është i kufizuar, pasi ajo ndodhi përmes një serveri të vetëm dhe se nuk goditi ndonjë faqe zyrtare të qeverisë izraelite.

Sulmi la mesazhin “Përgatituni për një surprizë të madhe” dhe një video që siguron se “llogaritja për shkatërrimin e Izraelit filloi shumë kohë më parë”.

Ndërkohë, pamjet tregojnë një simulim të disa qyteteve që janë shkatërruar nga shpërthimet dhe bombardimet.

Në lidhje me këtë, agjencia izraelite kibernetike rikujtoi që javën e kaluar kishte paralajmëruar sulme të mundshme nga Irani. Përveç kësaj, ai vuri në dukje se sulmi është “sipërfaqësor”, i kufizuar në një server të vetëm të përdorur nga subjektet private.

Nga ana e tij, Lotem Finkelstein, kreu i Cyberintelligence në firmën Checkpoint Software Technologies, detajoi që hakerat nga bota arabe, përfshirë Turqinë, Afrikën Veriore dhe Rripin e Gazës, janë të organizuar për të sulmuar vendet izraelite. /Telegrafi/