Lushtaku paralajmëron padi për shpifje ndaj avokatit Halilaj, i cili e akuzoi për sulm të armatosur

Ish-kryetari i Komunës së Skenderajt, Sami Lushtaku, ka paralajmëruar padi për shpifje kundër avokatit Gazmend Halilaj, i cili u sulmua sot me armë zjarri, kurse për sulmin ndaj tij e akuzoi Lushtakun.

Lushtaku, përmes një postimi në Facebook, tha se Halilaj ka bërë shpifje edhe kur e akuzoi për keqpërdorim të fondeve të UÇK-së para 20 vjetëve.

Lushtaku e quajti Halilajn si njeri të skandaleve dhe që ka problem me personalitetin e tij.

Postimi i plotë i Lushtakut:

“Reagim

Të dashur miq,

Para pak ditësh, një njeri me emrin Gazmend Halilaj, ka bërë shpifje të ulëta duke ma përmendur emrin për një rast inekzistent të para më shumë se 20 viteve. Këto shpifje vijnë nga njeriu i cili sipas mediave dhe njerëzve që e njohin, ka probleme të mëdha me personalitetin e tij.

Ai përveç shumë skandaleve, së fundi është akuzuar se ka përdhunuar seksualisht një vajzë të mitur në Drenas. U mundua që të tjerëve të ua hedhë të zezat që i kishte bërë vetë ai.

Unë do ta konsultojë avokatin tim që të ushtrojë padi kundër këtij shpifësi, i cili ka për qëllim që të fitojë famë duke u marrë unë me të. Për një “ngjarje” tjetër që sot i paska ndodhur, përsëri më paska akuzuar mua. Ai ka për qëllim që ta mbajë vëmendjen e publikut dhe mediave duke më akuzuar mua. Ju bëj thirrje organeve të rendit që të zbardhin edhe ndodhinë e sotme mbi bazë të fakteve. Të tillët si soji i tij që kanë probleme personaliteti, duan famë.

Unë nuk mirrem e nuk kam kohë për të, aq më pak për një njeri që akuzohet për keqpërdorim seksual të një të miture. Ju garantoj 100% se këto janë shpifje më të cilat do të merret gjykata.

Shpejt do ta padis për shpifje që ka për qëllim dëmtimin e imazhit dhe personalitetit tim”, ka shkruar Lushtaku.

Ndryshe, avokati Gazmend Halilaj ka njoftuar sot se është plagosur me armë zjarri.

Lexo po ashtu Plagoset avokati Gazmend Halilaj

Ai ka postuar disa fotografi në në profilin e tij në Facebook, ku ka treguar se është plagosur para shtëpisë së tij.

Ndëersa, në një deklaratë për Klan Kosova, avokati Halilaj e ka drejtuar gishtin kah Sami Lushtaku për sulmin me armë zjarri që iu bë sot para shtëpisë së tij.

Ai për më tepër e ka quajtur edhe kriminel të ftohtë atë dhe tha se për këto deklarata publike është i gatshëm të mbajë përgjegjësi para gjykatës. /Telegrafi/