Vuniqi dhe Susanne Schutz flasin për zhvillimet politike në vend  

Zëvendësministrja e Punëve të Jashtme e Republikës së Kosovës, Rejhan Vuniqi, ka pritur Susanne Schütz, drejtoreshë për Evropën Jug-Lindore, Turqi dhe shtetet anëtare të Asociacionit Evropian për Tregti të Lirë në Ministrinë e Punëve të Jashtme të Gjermanisë, ndërsa biseduan për zhvillimet e fundit politike në vend.

Në këtë takim, në të cilin ishte i pranishëm edhe ambasadori gjerman në Prishtinë, z.Christian Held, është biseduar për zhvillimet politike në Kosovë, përfshirë sfidat në krijimin e institucioneve të reja pas zgjedhjeve parlamentare të tetorit të vitit të kaluar, thuhet në njoftimin e MPJ-së.

Zëvendësministrja Vuniqi dhe diplomatja Schütz, gjatë këtij takimi, kanë biseduar edhe për zhvillimet politike në rajon, proceset e fqinjësisë së mirë dhe ato të integrimit të Kosovës dhe rajonit në strukturat evropiane.

Zëvendësministrja e Punëve të Jashtme ka falënderuar Schütz për angazhimin e saj dhe mbështetjen e vazhdueshme dhe shumë të çmuar që Gjermania vazhdon të jep për shtetin e Kosovës.

Raportet e shkëlqyeshme bilaterale midis Kosovës dhe Gjermanisë, sipas Vuniqit, duhet të shfrytëzohen edhe më shumë në rritjen e bashkëpunimit të ndërsjellë në të gjitha fushat me interes për popujt e të dyja vendeve. /Telegrafi/