Ambasada turke: Personat e lidhur me FETO-n në Maqedoninë e Veriut nuk do të mund të hyjnë në Turqi

Ambasada e Turqisë në Shkup paralajmëroi se tani e tutje, personat që punojnë në institucionet dhe subjektet e organizatës terroriste FETO në Maqedoninë e Veriut dhe ende ofrojnë mbështetje për aktivitetet e tyre, nuk do të mund të hyjnë në Turqi si më parë, transmeton (AA).

Siç thuhet në një deklaratë të ambasadës, Turqia i vazhdon aktivitetet kundër terrorizmit brenda dhe jashtë vendit me qëllim për ta bërë rajonin ku gjendet një vend më të sigurt. Kjo luftë kundër terrorizmit, thuhet në deklaratë, do të vazhdojë me vendosmëri derisa organizatave terroriste si FETO, PKK/KCK PYD/YPG, DEAŞ, DHKP-C dhe grupeve të tjera terroriste t’u jepet fund.

“Shteti mik dhe vëlla i Maqedonisë se Veriut deri më tani, fatkeqësisht, nuk e ka dhënë/nuk e jep mbështetjen e pritur në këtë luftë të Turqisë kundër organizatave terroriste. Në veçanti, institucionet dhe subjektet e organziatës terroriste FETO (siç janë Zaman Maqedoni, Shkollat Yahta Kemal, MIBA dhe fondacionet Shafak dhe Tolerans), që qëndron pas tentativës tradhtare për grusht shteti më 15 korrik, ende vazhdojnë aktivitetet në këtë vend”, thuhet në deklaratë.

“Personat që punojnë në institucionet dhe subjektet e organizatave terroriste në fjalë apo ende u japin mbështetje, tani e tutje nuk do të mund të hyjnë lehtësisht në Turqi sikur më parë”, theksohet më tej.

Ambasada turke ka shtuar se Turqia dëshiron që gjithnjë të veprojë së bashku me miqtë në këtë luftë të drejtë dhe ka dëshirë t’i ketë shtetet mike dhe vëllazërore pranë vetes.

“Si do që të jetë, Turqia është një vend që ka vullnet dhe forcë për ta bërë këtë luftë edhe e vetme”, thuhet në deklaratën e ambasadës turke në Shkup.