Rasti “Monstra”, sot bëhet analizë mbi makinën që është pjesë e dëshmive

Në kuadër të gjykimit për rastin “Monstra” të Prokurorisë Speciale, për vrasjen e pesëfishtë në Liqenin e Smillkovës më 12 prill të vitit 2012, sot do të bëhet analizë mbi makinën e cila është propozuar si dëshmi materiale për këtë rast.

Në seancën paraprake u dëgjua dëshmitari i mbrojtur, i cili dëshminë e tij e dha nga një hapësirë e veçantë dhe me zë të montuar, përcjell Telegrafi Maqedoni.

Në dëshminë e tij ai tha se në vendin e ngjarjes ka qenë më 9, 10, 11 dhe 12 prill dhe se atje ka parë një makinë të tipit “Golf 3” në disa lokacione.

Ndërsa mbrojtja shprehu dyshime në dëshminë e dëshmitarit të mbrojtur. Avokati i të akuzuarve Naser Raufi, tha se dëshmitari i mbrojtur është konfuz dhe nuk e tregon të vërtetën.

Për vrasjen e pesëfishtë në Liqenin e Smillkovës më 12 prill, me burg të përjetshëm u dënuan Alil Demiri, Afrim dhe Agim Ismailoviq, Ezim dhe Haki Aziri dhe Sami Luta.

Gjykata e Lartë në dhjetor të vitit të kaluar shfuqizoi aktgjykimet dhe liroi nga burgu Agim Ismailoviqin, Haki Azirin, Sami Lutën dhe Fejzi Aziri, të cilëve ju shqiptoi masa të përkujdesit./Telegrafi/