Shtirej si princ saudit, duke mashtruar investitorët – rrëfimi për njeriun që erdhi nga rrugët e varfra të Bogotës dhe u bë multi-milioner (Foto)

Një burrë në Florida i cili për dekada kishte pretenduar të jetë një princ saudit, ka pranuar se ka mashtruar investitorë të mëdhenj – madje me miliona dollarë.

Sipas mediave të huaja, përcjell Telegrafi, bëhet fjalë për Anthony Gignac, i cili vinte nga rrugët e varfra të Bogotës – Kolumbi, i cili prezantohej si Khaled Al-Saud dhe i cili u deklarua fajtor për vjedhje dhe mashtrim të identitetit.

Sipas zyrës së prokurorit amerikan, princi fals dhe një nga bashkëpunëtorët e tij krijuan një kompani mashtruese të investimeve, Marden Williams International LLC, në qershor të vitit 2015 dhe iu drejtuan investitorëve me “mundësi ekskluzive biznesi”.

Madje, siç bëhet e ditur, nga vetëm një investitor i vetëm ata përfituan një “mbështetje” prej 5 milionë dollarësh.

Gignac gjithashtu krijoi një mënyrë jetese ekstravagante për të mbështetur mashtrimet e tij.

Siç thuhet më tej, 47-vjeçari pretendoi se ai kishte një vendbanim në Ishullin Fisher, një komunitet ekskluziv nga Miami Beach i arritshëm vetëm me traget ose helikopter.

Ai kishte një shenjë në derën e përparme e cila shkruante thjesht “Sulltan”. “Princi” u tha njerëzve se ai kishte imunitet diplomatik dhe voziste një Ferrari me targa të rreme diplomatike.

Gjithashtu, për të “bindur” njerëzit ai u dhuronte bizhuteri të shtrenjta dhe piktura të bazuara në linjat e tij të supozuara saudite.

Në mars 2017, mbret i rremë u përpoq të blinte një hotel me shumë milion dollarë në Miami, dhe qëndroi në hotel duke përdorur një kartë krediti në emër të një anëtari aktual të familjes saudite.

Gignac gjithashtu përdori disa pseudonime për udhëtime ndërkombëtare.

Ndërkohë, në nëntor, ai fluturoi nga Londra në qytetin e Nju Jorkut duke përdorur një pasaportë të falsifikuar, para se të arrestohej më në fund nga policia.

Kur hetuesit kontrolluan shtëpinë e Gignac në Miami, ata zbuluan kartela mashtruese diplomatike, karta krediti të paautorizuara, dokumente financiare të Mbretërisë Saudite, municione dhe mijëra dollarë.

Gignac përballet me një dënim maksimal prej 20 vjetësh për akuzat për mashtrim dhe është planifikuar të dënohet në gusht. /Telegrafi/