Kasumi beson se nuk është larg nga vendi i ngjarjes as trupi i pajetë i policit të dytë

Zhytësi i njohur Ismajl Kasumi, ka folur rreth gjetjes së trupit të pajetë të policit, Malsor Dashi.

Kasumi me ekipin e tij nisën kërkimin në zonën ku ka rënë vetura e dy policëve.

Ai ka treguar momentet kur e ka vërejtur trupin…

“Në atë moment që kam pa Trerën duke vrapuar, e kam ditë që ka diçka, unë me hoxhën kemi shkuar bashkërisht dhe e kemi pa dhe momenti i parë që ka qenë e kam lyp një batanije për mos mu trazu ajo popullatë që ishte jashtë”, tha Kasumi.

Ai foli edhe për të gjithë aksionin e sotëm ku falënderoi të gjithë ata që ishin pjesëmarrës në gjetjen e trupit të pajetë të policit Malsor Dashi.

“Dua t’i falënderoj të gjithë vullnetarët të cilët u angazhuan sot në aksionin për gjetjen e trupit të pajetë të policit. Imamin e xhamisë së Kaçanikut, nxënësit e mi, njësinë speciale që na ndihmuan shumë”.

“Ne filluam nga vendi ku ka ndodhë rasti, ku i kontrolluam të gjitha vendet e dyshimta, sidomos ato urat ku kanë qenë të mbyllura dhe të zëna, dhe më në fund arritëm të gjejmë njërin nga trupin e pajetë. Ishte një punë profesionale nga të gjithë ata që kanë qenë të kyçur në këtë rast, në rrjedhat e këtij lumi”, tha Kasumi.

Ai ka shtuar se kërkimet për policin tjetër priten të vazhdojnë nesër.

“Ka mbetur të kërkohet nëpër vende tjera për trupin e dytë. Besoj që edhe trupi tjetër nuk është larg”, ka përfunduar Kasumi.

Ndëkaq, trupi i pajetë i policit Malësor Dashi tashmë ka arritur në Institutin e Mjekësisë Ligjore, ku edhe pritet të kryhet autopsia.

Megjithatë, drejtori i këtij instituti, Arsim Gërxhaliu, ka thënë se ata po e presin kërkesën nga prokurori i rastit për të vazhduar me procesin e autopsisë. /Telegrafi/