Xhafaj: Gati plani për të zëvendësuar punonjësit e policisë që do të largohen nga vettingu

Pas miratimit në parim të ligjit për vettingut në policinë e shtetit, ministri i Brenshëm Fatmir Xhafaj, paralajmëron largime të konsiderueshme nga kjo strukturë.

I ftuar në emisionin ‘Përballë’ në RTSH 1, Xhafaj tha se mekanizmat e deritanishëm nuk kanë funksionuar për të shkëputur lidhjet e punonjëve të policisë me krimin.

“Një pjesë e mirë e oficerëve të policisë, të tre niveleve që ka policia, nuk do të jenë më pjesë e strukturave të policisë, nëse do të konstatohet si të korruptuar, kanë probleme me integritetin e figurës dhe për paaftësi. Kjo e fundit zgjidhet me trajnime. Por nuk mund të qëndrojnë në rradhët e policisë në rastin e dy të parave”, tha Xhafaj.

Largimet nga policia si pasojë e vettingut, mund të krijojnë një vakum në këtë strukturë, por Ministria e Brendshme ka menduar edhe për shtimin e punonjëve të policisë.

“Nëse do të kemi një shifër të lartë të largimit nga rradhët e punonjësëve të policisë, atëherë kemi gjykuar një mënyrë për ta plotësuar këtë vakum, rekrutimin përmes akademisë, të djemve dhe vajzave që kanë një diplomë në drejtësi, financë dhe degë të tjera të përshtatshme. Duhet të kenë një diplomë master dhe një periudhë 1 vjeçare për t’u rekrutuar si punonjës policie”, tha Xhafaj.

Por sistemi i vettingut në rradhët e policisë nuk do të jetë I përkohëshëm. Xhafaj tha se Shërbimi i Kontrollit të Brendshëm do të ristrukturohet dhe një degë e tij do të merret vetëm me vettingun e punonjësve të policisë.

“Do të ndërtojmë një sistem të detyrueshëm të kontrollit. Vit pas viti oficerët e policisë do të plotësojnë deklarata në lidhje me gjendjen pasurore. E njëjta metodologji që aplikohet në vende të tjera që kanë standard”, u shpreh Xhafaj. /Telegrafi/