Familjarët e të pagjeturve dhe viktimave të luftës, vazhdojnë të kërkojnë drejtësi

Familjarët e të pagjeturve dhe viktimave të luftës shprehen të pakënaqur me angazhimin e institucioneve të vendit dhe atyre ndërkombëtare për zbardhjen e fatit të familjarëve të tyre.

Ata thonë se ekzekutuesit nuk u nxorën asnjëherë para drejtësisë, që është një padrejtësi që po u bëhet.

Have Pajaziti nga Dobroshi i Gjakovës , tashmë rreth të 90 –tave, më 27 prill 1999 ka humbur 8 anëtarë të familjes: katër djemë, dy reja dhe dy mbesa të vogla, të cilët i ka rivarrosur në Lëndinën e pikëllimit në Meje.

Vetëm Idrizi, njëri nga katër djemtë e saj, ende nuk është gjetur.

Dhimbja e rëndon edhe më shumë sepse kriminelët që kryen këtë akt makabër nuk u sollën asnjëherë para drejtësisë.

Nesrete Kumnova, familjare dhe aktiviste e zbardhjes së fatit të të pagjeturve, po shpreh pakënaqësinë e madhe në emër të të gjitha nënave që gjatë luftës humbën më të dashurit e tyre, ndërsa që ekzekutuesit nuk u nxorën asnjëherë para drejtësisë.

Ajo thotë se është e habitur se si është e mundur të ndodhë një gjë e tillë, madje edhe tashmë kur po bëhen gati dy dekada.

Vetëm në komunën e Gjakovës gjatë luftës së fundit 98/99 janë vrarë dhe masakruar mbi 750 qytetarë. Përderisa në nivel vendi ky numër shkon në rreth 6000 persona. Ndërsa drejtësia për këto krime duket se e ka humbur edhe kuptimin thonë familjarët e tyre.