Dëshpërimi si mënyrë jetese: Fytyra e vërtetë e varfërisë amerikane (Video)

Nëse dëshironi ta dini se si duket varfëria në Shtetet e Bashkuara, atëherë shikoni reportazhin e BBC-së të realizuar në Batlimore.

Edhe pse Baltimore i Marylandit viteve të fundit ka përjetuar një rritje të konsiderueshme ekonomike, duket se ky “lulëzim” nuk ka arritur në shumë pjesë të varfra të qytetit, ku shkalla e varfërisë është e lartë dhe sillet deri në 25 për qind, transmeton Telegrafi.

Krimi në Baltimore vjen si rezultat i qërimit të hesapeve mes bandave lokale, që madje gjatë viteve të fundit i kanë tejkaluar shifrat makabre të vrasjeve të Chicagos që viteve të fundit është shndërruar në fushëbetejë të kriminelëve.

Për shumë banorë të kësaj zone, për fat të keq, mënyra e vetme për të fituar para për të mbetur gjallë është shitja e drogës, por edhe e trupit për kënaqësi seksuale.

Presidenti i ri amerikan, Donald Trump, në fillim të mandatit të tij kishte bërë të ditur se do ta “zgjidh” problemin e varfërisë, si dhe “masakrat” që janë si rezultat i krimit të organizuar, drogës dhe bandave, e në veçanti në pjesë e qytetit që janë kryesisht të banuara me afrikano-amerikanë dhe pakica hispanike.

Një banor i kësaj zone të cilin ekipi i BBC-së e kishte takuar në një kuzhinë popullore, i pyetur se çfarë porosie ka për presidentin Trump, ai është përgjigjur duke thënë: “Në vend se të na kritikosh, eja këtu dhe na ndihmo, dhe do ta kuptosh se ne vërtetë kemi nevojë për ndihmë”.

Shtëpitë në të cilat jetojnë të varfrit janë pothuajse të shkatërruara, plot minj, buburreca dhe insekte tjera.

“Lagjet janë duke u shkatërruar, jo për faktin që njerëzit që jetojnë në këto lagje janë të këqij, por që nuk paguhen mjaftueshëm e janë të paarsimuar. Shumë prej nesh kemi jetuar në atë mënyrë dhe mund të them lirisht se jemi gjenerata e dytë apo e tretë me radhë e assesi nuk po dimë si ta ndryshojmë këtë. Dëshpërimi është një mënyrë e jetës këtu”, ka deklaruar një afrikano-amerikan që merret me rinovimin e shtëpive. /Telegrafi/

https://www.youtube.com/watch?v=qytbhMlXltI