Evropianët e rinj me “hise” në institucione

Rinia Evropiane e Kosovës përmes qeverisë së tyre së bashku me institucionet e Kosovës kanë filluar ta implementojnë programin e tyre për fuqizimin dhe pranimin e të rinjve me përvojat e tyre në institucionet kryesore të Republikës së Kosovës, duke dërguar këshilltarë për çështje të të rinjve pranë institucioneve kryesore si Kuvendi disa nga ministritë dhe dikasteret tjera kryesore në vend, e gjithë kjo me qëllim të fuqizimit të rinisë brenda institucioneve të Kosovës.

Të rinjtë pjesëmarrës të këtij programi do të jenë të diplomuar në institucione prestigjioze ndërkombëtare dhe detyrë kryesore kanë zhvillimin e aktiviteteve për politika më të mira për sektorin e rinisë.

Presidenti i Rinisë, Avdullah Hasani u shpreh: “Me qëllim të bashkërendimit të aktiviteteve të të rinjve me institucionet e Republikës së Kosovës, si dhe me synim që të rrisë praninë e të rinjve në jetën institucionale, aty ku bëhen politikat publike, ku të rinjtë do mund të kontribuojnë nga afër në zhvillimin e politikave në favor të qytetarëve të Kosovës, nëpërmjet programit të “Evropianëve të rinj”, kemi filluar që së bashku t’i zbatojmë memorandumet e bashkëpunimit me të gjitha institucionet respektive duke ndikuar kështu që për herë të parë në Kosovë të zhvillojmë një program të tillë dhe me shpresë shumë produktivë për institucionet dhe gjeneratën e re”.

Ndryshe ky program, përveç institucioneve kryesore të vendit përkrahet edhe nga ambasadat e huaja në vendin tonë.