Shqipëria nuk e di kush fluturon në ajrin e saj!

Me anëtarësimin e Shqipërisë në Aleancën e Atlantikut të Veriut, vendi ka nënshkruar një marrëveshje për policimin ajror. Meqenëse Shqipëria nuk ka radar primar, NATO ia ka deleguar kompetencën e monitorimit të hapësirës ajrore të Republikës së Shqipërisë dy vendeve fqinje, Italisë dhe Greqisë, të cilat e kryejnë këtë rol me sistem rotacioni.

Lexo po ashtu Ushtria shqiptare, dikur dhe sot: Do të befasoheni edhe me forcën ushtarake të kohës së Enver Hoxhës (Video)

Sipas Ministrisë së Mbrojtjes, cituar nga një raportim i kanalit televiziv Ora, në rastin e rrëzimit të aeroplanit sportiv të tipi “piper” në Ishëm të Durrësit, qendrat e huaja të vëzhgimit ajror nuk e kanë njoftuar qendrën shqiptare të kontrollit.

E, çuditshme, por e vërtetë: Shqipëria pret që Italia dhe Greqia të informojnë qendrën e NATO-s për fluturime të paligjshme në territorin e saj dhe kjo qendër më pas të njoftojë Shqipërinë.

Monitorimin NATO e kryen nga baza e Torrjenit në Spanjes , ku është qendra e monitorimit ajror që furnizohet me informacion nga dy bazat në Greqi dhe Itali. Në momentin që njëra nga këto dy baza raporton për fluturime të paligjshme në qiejt që mbajnë nën monitorim, baza ajrore e Spanjës njofton autoritet e vendit që i janë cenuar kufijtë të ngrejë në fluturim aeroplanët F16 apo modele të tjera që të bëhet i mundur ndalimi i mjetit të paidentifikuar fluturues!

Por, Shqipëria tashmë nuk ka aeroplanë.

Sipas Indeksit Global të Fuqisë Ushtarake (Global Firepower Index) për vitin 2016, të dhënat e të cilit u botuan në muajin shkurt nga DITA, Ushtria shqiptare zë vendin e 100-të me 2.5331 pikë mes 126 vendeve të botës për të cilat është llogaritur ky indeks.

Indeksi është hartuar në bazë të një metodologjie komplekse, e cila merr në konsideratë më shumë se 50 faktorë të ndryshëm. Në veçanti: numri i Ushtrisë, numri i tankeve, anijeve, aeroplanëve dhe pajisjeve të tjera ushtarake, niveli i financimit të sferës ushtarake, infrastruktura e transportit të vendit, qasja në produktet e naftës dhe faktorë të tjerë që mund të ndikojnë në aftësinë luftarake të ushtrisë, por Indeksi nuk përfshin armët bërthamore.

Në vendet me Ushtritë më të fuqishme të botës përfshihen SHBA, Rusia, Kina, India, Britania e Madhe, Franca, Italia, Koreja e Jugut, Gjermania, Brazili, Japonia, Turqia.

Në Ballkan, pas Turqisë që është e dhjeta në botë, Ushtrinë më të fuqishme e ka Rumania (1.3746 pikë, e 56-ta në botë), në vendin e tretë është Greqia (1.4853 pikë, vendi i 60 në botë) , pastaj vijnë Kroacia (1.5042 pikë , e 62-ta në botë), Bullgaria (1.6721 pikë, e 67-ta në botë), Serbia (e 70-ta në botë me 1.6944 pikë), Bosnja dhe Hercegovina (e 89-ta në botë me 2.2811pikë) dhe Shqipëria (e fundit në rajon dhe e 100-ta në botë më 2.5331pikë).

Në Indeks nuk janë përfshirë Mali i Zi dhe Kosova.