Të varfrit i shpohet daullja edhe në dasmë: Rruga e Kombit apo e biznesit?

Lulzim Omuri

Akoma pa u qetësuar nga emocionet maratonë të kalimit të reformës në drejtësi, qytetarët e qarkut të Kukësit dhe të gjithë përdoruesit e Rrugës së Kombit, lexuan në media se shpallet taksambledhësi shtesë për këtë rrugë.

Hapja e kësaj rruge uli në mënyrë të dukshme kostot e transportit, si dhe kohën për udhëtimin nga Kukësi drejt metropolit dhe bregdetit, dhe jo më pak e rëndësishme shkurtoi distancën Shqipëri-Kosovë. Edhe një arsye që kjo të quhet “Rruga e Kombit”.

Shumë banorë të zonës u kthyen në pronat e tyre dhe ndërtuan, dikush një shtëpi, dikush tjetër investoi në bujqësi apo blegtori, pasi tashmë tregu dhe koha ishin shumë më afër e shkurt. Gjithashtu, kjo rrugë ndikoi shumë edhe në turizmin, duke dashur të përmendim dhjetëfishimin e turistëve në Valbonë, në malet e Kukësit, në të gjithë luginën e Drinit të Zi dhe atij të Bardhë.

Dukshëm është edhe interesi i kryetarit të Bashkisë Kukës, Bashkim Shehu, për realizimin e kushteve të favorshme për investime në afrimin e shumë bizneseve, në mënyrë që të ndikojë në uljen e papunësisë në një zonë ku për nga niveli i papunësisë renditet ndër të parat në rang kombëtar – në mos i pari.

Në këtë analizë nuk dua të përqendrohem në kanalin e ndikimit që do të ketë vendosja e kësaj takse në turizëm, ku mbi 50 për qind vijnë në vend nga trojet shqiptare, duke përshkuar Rrugën e Kombit. Ky ndikim do të jetë një tregues i reflektuar direkt në shifrat e turizmit vitin e ardhshëm.

Por, çfarë ndodh?

Më 22 korrik jepet njoftimi për shpalljen e një fituesi privat, madje i huaj, në një rrugë të ndërtuar nga taksat e qytetarëve shqiptarë. Kjo nuk është një rrugë e ndërtuar nga një firmë private, e cila në bazë të një kontrate edhe mund ta shfrytëzonte pas ndërtimit. Por, fakti është se e gjitha është investim publik nga Buxheti i shtetit.

Qytetarët shqiptarë paguajnë sot taksën e qarkullimi,t e cila paguhet çdo vit nga përdoruesit e automjeteve. Në këto kushte është fare e thjeshtë situata që do të krijohet. Qytetarët do të paguajnë tri herë të njëjtën rrugë: një herë kur u ndërtua, një herë në vit në taksën e qarkullimit, dhe tashmë për çdo kalim që do ta bëjnë.

Kur një rrugë bëhet me pagesë, gjithmonë shteti ka për detyrë të ofrojë një rrugë alternative për ata që nuk kanë mundësi ta paguajnë atë. Mos vallë po i fton të kalojnë rrugës së vjetër përsëri?

Nëse bëjmë një krahasim për autostradën në një vend fqinj, si Maqedonia, aty paguhet 5.5 euro për 300 kilometra. Ndërsa, ne do të paguajmë pesë euro për 100 kilometra një rrugë publike.