Ambasadori i Shqipërisë i befasuar me LDK-në e PDK-në

Qemal Minxhozi, ambasadori i Shqipërisë në Kosovë është shprehur të jetë i befasuar me debatin e partive politikë në Kosovë, për vendin që duhet t’i ndahet Ambasadës së Shqipërisë për rezidencë.

“Jam i befasuar me çështjen e pronës së Ambasadës së Shqipërisë në Kosovë. Nuk e besoj se kjo do të jetë temë takimi në mes dy qeverive asaj të Kosovës dhe Shqipërisë që do të mbahet me 3 qershor”, ka thënë Minxhozi ën emisionin Zona B në Klan Kosova.

Sipas tij, vendi ku do të ndërtohet Ambasada e Shqipërisë në Kosovë, ka fare pak rëndësi dhe se kryeministrat në mbledhjen e qeverive, duhet të diskutojnë për të arriturat që kanë pasur gjatë këtij viti.

Kuvendi Komunal i Prishtinës, të martën nuk ka arritur që ta miratojë pronën ku do të ndërtohej Ambasada e Shqipërisë në Kosovë, për shkak se LDK-ja dhe PDK-ja nuk ishin dakord.

Minxhozi, thotë se Kosova dhe Shqipëria tashmë janë unifikuar.

Ai përmendi disa sfera ku të dyja vendet janë të bashkuara.

“Tani udhëtimi për ne Shqipëri do te jete i njëjte si ne territorin e Kosovës ngaqë do të ketë unifikim. Kemi hequr tatimin e dyfishtë dhe kjo duhet vlerësuar”, shprehet ai.

Minxhozi mendon se Kosova e Shqipëria, duhet të unifikohen edhe në sistemin tatimor e doganor.

“Është mire që të bëjmë unifikimin e praktikave të tatimit dhe të doganave të Kosovës. Do të kemi një sistem doganor të përafërt me njëri-tjetrin, të mos ketë diferenca. Sistemi doganor i Kosovës, është më i përparuar dhe më sofistikuar e ne duhet të përfitojmë nga kjo”, deklaron Minxhozi.

Sipas tij, edhe Kosova edhe Shqipëria kanë ngecje sa i përket administratës publike dhe duhet të punohet në këtë drejtim.

Ambasadori Minxhozi, ndër të tjerash deklaroi se të dyja vendet duhet të arrijnë në një sistem binjakëzimi, ku kualifikimet e një personi në Shqipëri të njihen në Kosovë dhe anasjelltas dhe kjo do të ndihmonte në bashkimin e vlerave të këtyre dy shteteve.