Rrëfehet nxënësi i rrahur në Rahovec (Video)

Një video e shpërndarë nëpër media dhe rrjete sociale ka shokuar opinionin, pasi një mësues shihet duket rrahur një nxënës.

Lidhja direkte në emisionin Ora e Fundit të Klan Kosovës i është kushtuar këtij incidenti, ku para kamerës ka folur babai i nxënësit të rrahur si dhe vetë nxënësi, por ky i fundit ka folur pa e zbuluar fytyrën.

Babai i tij, Besnik Berisha, ka sqaruar se si e ka takuar djalin duke qarë në rrugë dhe procedurën që e ka ndjekur më pastaj.

“Gjatë orës 12:20 pasdite e kam takuar djalin duke qarë tha më ka rrahur mësuesi Gani. Kur e pyeta mësuesin, tha djali më ka fyer shumë, por nuk është e vërtetë që e ka fyer, se ka folur vetëm një fjalë. Pas kësaj kemi shkuar te drejtori së bashku me mësuesin Gani. Drejtori ka thënë që t’i kërkojmë falje. I kemi kërkuar ,djali ka hyrë në klasë, pas dy ore pastaj kemi parë videon çfarë ka ndodhur. Rastin e kemi paraqitur në Polici,” ka thënë Berisha, njofton Klan Kosova.

Viktima në këtë rast tregon se mësuesi fillimisht e ka shtyrë, ky ia ka kthyer me një fyerje, e më pastaj ka pasuar dhuna e mësuesit.

“Unë i thash mësuesit dua të shkojë në shtëpi. Ai më ka shty njëherë, nuk më ka lënë me hy. E kam sharë, pastaj ka filluar të më godas shumë. Unë e kam sharë pasi më ka humbur kontrolli, pasi më ka shtyrë shumë. Një herë e pati rrahur një shok te klasës vetëm pasi e ka kthyer kokën mbrapa dhe ja ka lëvizur unazën nga vendi. Ai nuk e ka bërë të madhe këtë,” ka përfunduar nxënësi i rrahur.