Porsche me dy modele të reja për Gjenevë (Foto/Video)

Kompania Porsche edhe më herët ka konfirmuar se do të ridizajnojë versionet e modelit Boxter dhe Cayman, duke përfshirë ndryshime vizuale, motorë të rinj, si dhe ndryshimin e emrave të tyre.

Kështu modeli Boxter tani ka ndërruar emrin 718 Boxter, ndërsa Cayman në 718 Cayman.

Gjithashtu është konfirmuar se 718 Boxter dhe 718 Cayman do të kenë motorët Turbo me katër cilindra, ndërsa tani janë shfaqur edhe fotografitë e para zyrtare dhe detajet për modelin 718 Boxter dhe për versionin e tij S.

Promovimi i 718 Boxter (718 Spyder) do të mbahet në fillim të muajit mars të këtij viti në panairin e veturave në Gjenevë, transmeton Koha.net. Në të njëjtën kohë pritet të shfaqet edhe 718 Cayman.

Porsche 718 Spyder vjen me motor benzinë 2.0-litër Turbo me katër cilindra dhe me kapacitet prej 300 kuajfuqi, 35 kuajfuqi më shumë sesa i zëvendësuari motori atmosferik 2.7-litër me gjashtë cilindra. Në kombimin me marshin PDK me koplung të dyfishtë dhe me paketën “Sport Chrono”, ky 718 Boxter shpejtësinë nga 0 deri në 100 kilometra në orë e arrin për 4,7 sekonda (0,8 sekonda më shpejtë sesa paraardhësi), ndërsa atë maksimale deri në 275 km/h.

Versioni më i fortë, 718 Boxter S (718 Spyder S) vjen me motorin 2.5-litër Turbo me katër cilindra dhe me kapacitet prej 350 kuajfuqi, 35 kuajfuqi më shumë sesa motori atmosferik 3.4-litër me gjashtë cilindra i paraardhësit Boxter S. Në kombimin me marshin PDK dhe me paketën “Sport Chrono”, ky 718 Boxter S shpejtësinë prej 0 deri në 100 km/h e arrin për 4,2 sekonda (0,6 sekonda më shpejtë sesa paraardhësi i tij), ndërsa atë maksimale deri në 285 km/h.

Pavarësisht kuajfuqive që kanë, këta motor të rinj janë më ekonomike për 13 për qind sesa motorët e paraardhësve. Kështu, 718 Spyder me marshin PDK shpenzon karburant mesatarisht 6.9-litra në 100 km (për 1.0-litër / 100 km më pak sesa paraardhësi), ndërsa 718 Spyder S, sipas të dhënave nga fabrika, shpenzon karburant mesatarisht 7.3-litër në 100 km (për 0.9-litër / 100 km më pak sesa paraardhësi).

Duhet theksuar se në mënyrë standarde në këto modele do të përfshihen edhe marshët manual me gjashtë shpejtësi, si dhe se edhe amortizatorët dhe sistemi i tërheqjes do të pësojnë ndryshime, transmeton Koha.net. Do të ofrohet Porsche Active Suspension Management (PASM), që do të thotë se automobili do të jetë më i ulët për 20 milimetra.

Ashtu edhe siç është pritur, edhe fotografitë zyrtare e konfirmojnë, ridizajnimi i këtyre modeleve nuk ka sjellë ndryshime drastike në krahasim me modelet aktuale.

Ndër të tjera, këto modele karakterizohen me dritat e reja, mbrojtësit e rinj, rrotat e reja prej alumini me diametër prej 19-inç (me mundësi për zgjedhje edhe deri në 20-inç), si dhe timonin e ridizajnuar dhe sistemin infotainment PCM me ekran të ri të ndjeshëm në prekje.

Shitja e 718 Boxter dhe 718 Boxter S, në Evropë, do të fillojë nga 30 prill.

Në Gjermani, 718 Boxter do të kushtojë 53.646 euro, ndërsa 718 Boxter S 66.141 euro.