Shqipëri, remitencat me rënie

Investimet e huaja direkte pësuan rënie të fortë në tremujorin e dytë të këtij viti. Sipas të dhënave nga Banka e Shqipërisë, vlera e investimeve të huaja zbriti në 141 milionë euro, nga 293 milionë euro që pati qënë në të njëjtën periudhë të vitit të kaluar.

Këtu duhet marrë parasysh se vitin e kaluar pati një efekt përcaktues nga privatizimi i disa hidrocentraleve, çka pati sjellë një vlerë mjaft të lartë të investimeve të huaja direkte. Edhe po të krahasojmë dy gjashtëmujorët, këtë vit vlera e investimeve të huaja direkte është në rënie me 13 për qind. Kjo tregon se në fakt investimet e huaja direkte po e vuajnë krizën dhe, në rastin e Shqipërisë, janë mjaft të varura nga privatizimet strategjike.

Zhvillime më pozitive në tremujorin e dytë të viti kanë shfaqur remitancat, që kishin vlerën e 135 milionë euro, rreth 5 milionë euro më shumë krahasuar me të njëjtën periudhë të vitit të kaluar. Me gjithë rritjen e lehtë në tremujorin e dytë, të dhënat e viteve të fundit kanë treguar se dërgesat e emigrantëve tashmë kanë hyrë në ciklin e rënies dhe një rimëkëmbje e tyre është pothuajse e pagjasë, raporton ScanTv.

Përveç ndikimit të krizës, remitancat me kalimin e viteve janë të destinuara të kenë një trajektore të natyrshme rënëse, çka lidhet me dobësimin e lidhjeve të emigrantëve që e ndërtojnë jetën jashtë.

Për gjithë gjashtëmujorin, dërgesat e emigrantëve kanë pothuajse të njëjtën vlerë më vitin 2013. Stanjacioni i remitancave dhe rritja e deficitit tregtar këtë vit e kanë rritur ndjeshëm deficitin e llogarisë korrente. Deficiti që konsiston në diferencën mes flukseve hyrëse dhe dalëse të parasë për gjashtëmujorin 2014 preku vlerën e 618 milionë eurove, në rritje me 22 për qind krahasuar me të njëjtën periudhë të një viti më parë. /Telegrafi/