Alarm nga kreditimi!

Deri në fund të vitit kosovarët do të hyjnë borxh në banka mbi 2 miliardë euro. Nëse realizohet parashikimi i pronarëve të bankave komerciale, kredimarrës kryesorë do të jenë ekonomitë familjare. E natyra e kredive pritet të jetë kryesisht konsumuese.

Aktualisht shuma e kredive të lëshuara nga 10 bankat komerciale në vend është 1.8 miliard euro. Prej tyre 1.2 miliard euro u janë lëshuar ndërmarrjeve, ndërsa 604 milionë euro kredi janë lëshuar për ekonomitë familjare.

Këto të fundit sipas raporti të Bankës Qendrore të Kosovës për zhvillimet makroekonomike pritet të rriten edhe më tej. Njohës të ekonomisë vazhdimisht kanë tërhequr vërejtjen se rritja e numrit të qytetarëve që u drejtohen bankave për të financuar konsumin është problem serioz për ekonominë e vendit. Gjithashtu ky indikator merret edhe si alarm për gjendjen sociale në vend.

Mediet kanë raportuar së fundi se sipas Anketës së Buxhetit të Ekonomive Familjare për vitin 2013 rezulton se Konsumi për kokë banori në Kosovë gjatë vitit 2013 ishte 1402 euro, që i bie jo më shumë se 116 euro në muaj, ndërsa konsumi për ekonomi familjare është 7625 euro, që në muaj është 635 euro. /Tribuna/Telegrafi/