KOSID: Me “Kosovën e Re” rryma dyfish më shtrenjtë

Çmimi i energjisë elektrike gjatë procesit të ndërtimit të Termocentralit “Kosova e Re” – dhe pas saj – do të jetë dyfish apo edhe më i lartë se që është tani, kanë bërë të ditur Konsorciumi Kosovar i Shoqërisë Civile për Zhvillim të Qëndrueshëm – KOSID, të cilin kundërshtojnë procesin e hapjes së tenderit të këtij termocentrali me vetëm një ofertues.

Sipas hulumtimeve të KOSID-it, të bëra për kompaninë që është i vetmi ofertues i këtij tenderi, del që çmimi i energjisë do jetë 80 euro për megavat, nga 32 euro që është tani.

Koordinatori i KOSID-it, Visar Azemi, tha se kjo gjë do ta sjellë Kosovën në një rast edhe më social se që është tani.

“Ngjashëm kem edhe deklaratën e drejtorit të Bankës Botërore i cili thotë se çmimi i energjisë, pas ndërtimit të termocentralit ‘Kosova e Re’, do të shkojë në 80 euro për megavat, ngjashëm me çmimin të cilin kompania e ka në Bullgari. Kur çmimi të rritet si pasojë e këtij investimit të madh, do të shohim se pakënaqësitë sociale do të rriten në të njëjtën kohë”, tha Azemi.

Agron Demi, nga instituti GAP, ka thënë se kundërshton hapjen dhe dhënien e tenderit për “Kosova e Re” me vetëm një ofertues, sidomos kur nuk dihet sa do të jetë shuma e investimit apo edhe numri i të punësuarve. Për të ende më shqetësuese është fakti që ish kryeministri i Kosovës, Hashim Thaçi, përmes një postimi në Facebook e ka dhënë mendimin e tij për këtë tender ende pa e bërë komiteti drejtues i projektit.

“Do të duhet t’ju tregojmë qytetarëve se investimet në ‘Kosovën e Re’ nuk do të jenë as miliardëshe dhe as nuk do të ketë mijëra vende të punësuarve. Madje, do të ketë largim të punëtorëve të punës, për shkak se një aktivitet i tillë nuk do të ketë më shumë se dhjetëra të punësuar për shkak të teknologjisë së përparuar. Pra, shqetësuese është që ish kryeministri menjëherë është ngutur dhe ka dhënë verdiktin e tij”, tha Demi.

Sipas tyre, ky projekt që nga fillim është përcjellë me procedura jotransparente dhe se janë shpenzuar shuma të pajustifikuara parash për asistencë teknike.

Termocentrali “Kosova e Re” është një projekt i cili ka filluar tetë vite më parë dhe është përcjell deri më tani nga katër ministra. Ky projekt ka pësuar ndryshime vit pas viti, duke u bërë ndarja e termocentralit “Kosova B” nga pakoja tenderuese e projektit “Kosova e Re”. /KP/