Në Shqipërinë e varfër, rrogat deri në 72 mijë euro: Ja çfarë ndodh bëhet në ““Bankers Petroleum”!

Gazeta “DITA” posedon një bordero të kompanisë “Bankers Petroleum”, nga e cila mësohen shifra të jashtëzakonshme në pagesat e zyrtarëve të saj.

Në kompaninë me rreth 550 punonjës, 70 persona kanë paga mbi një milion lekë në muaj (7142 euro). Brenda këtij grupimi ka paga që shkojnë 1.5, 2,3 e më shumë milionë lekë në muaj (deri në 22 mijë euro).

Nga këta 70 persona, vetëm dy janë shqiptarë. Ndërkohë, 20 drejtues të kompanisë kanë pagë mbi pesë milionë lekë në muaj (!)

Kurse tre drejtues të lartë të kompanisë kanë rrogë stratosferike në shifrën e pabesueshme të 10 milionë lekëve në muaj (mbi 71 mijë euro).

Sipas një statistike të tatimeve, në Shqipëri vetëm rreth 100 vetë kanë paga mbi një milionë lekë në muaj. Nga këta persona, mbi 70 i përkasin… kompanisë Bankers!

Këta të superpaguar figurojnë në bordero si “supervizorë” dhe janë kryesisht familjarë të drejtuesve të huaj të kompanisë, që punojnë në Shqipëri.

Dhe, gjithçka nuk mbaron këtu.

Supervizorët, veç pagesave fikse multimilionere, marrin mijëra dollarë të tjerë për dieta dhe ushqim. Ata udhëtojnë vetëm në klasë biznesi.

Burime brenda kompanisë thanë për DITA se shumica e këtyre individëve vijnë në Shqipëri një herë në një deri në tre muaj për të tërhequr paratë, por megjithatë në emër të tyre figurojnë apartamente luksoze, vila në Tiranë dhe badigardë.

Vetëm zëri në buxhet për badigardë është tre milionë dollarë në vit!

Kontrata i njeh Bankersit të drejtën të mos paguajnë taksa nëse të gjitha fitimet i investon.

Dhe, kompania ka gjetur (ndër të tjera) një goxha mënyrë për të “investuar” për naftën shqiptare: paguan paga të tilla, gjysma e të cilave ia kalojnë edhe pagës së Presidentit të SHBA-ve.

Para disa vitesh, plasi skandali i rrogës së drejtorit të CEZ-it që merrte 66 mijë euro në muaj!. Po ai ishte vetëm një.

Rekordin tashmë e mban Bankers Petroleum, kompania që u fut në Shqipëri në vitin 2004 pas një kontrate me qeverinë e Fatos Nanos që u vijua nga qeveria Berisha dhe vijon ende sot. /Dita/