Studimi i ri tregon pse prindërit kyçen në Facebook

Shumica e prindërve në ShBA po i bashkohen Facebookut për të dhënë dhe për të pranuar këshilla prindërore, ka konstatuar një studim i ri.

Studimi i “The Pew” zbuloi se tri e katërta e prindërve të fëmijëve nën moshën 18-vjeçare kanë llogari në Facebook.

94 për qind e prindërve që ishin pjesë e studimit kanë deklaruar se janë aktivë në Facebook me postime komente e shpërndarje. Studimi gjeti se nënat e përdorin Facebookun më shumë se baballarët, me 37 për qind e nënave që hyjnë “shpesh” në krahasim me 20 për qind të baballarëve.

75 për qind e prindërve kyçen në Facebook përditë, teksa 51 për qind e shfrytëzojnë rrjetin social disa herë në ditë. Kjo është më shpesh se çiftet që s’kanë fëmijë, me 67 për qind që hyjnë përditë në Facebook dhe 42 për qind që kyçen disa herë në ditë.

Prindërit japin dhe pranojnë këshilla emocionale, sociale dhe prindërore në Facebook, ka gjetur hulumtimi.

81 për qind e prindërve që ishin pjesë e studimit thonë se mundohen të reagojnë në lajmet e mira që miqtë e tyre i shpërndajnë, teksa 58 për qind e tyre thonë se mundohen të reagojnë në lajmet e këqija, raporton “siliconbeat.com”, transmeton koha.net.

74 për qind thonë se kanë marrë përkrahje nga miqtë në Facebook dhe 45 për qind e nënave që e përdorin rrjetin social “pajtohen fuqishëm” se marrin përkrahje dhe ndihmë nga miqtë, gati dyfish më shumë se meshkujt që ndihen njësoj.

Rreth 80 për qind e prindërve që e përdorin Facebookun kanë gjetur informata të nevojshme në të, teksa më shumë se gjysma e shohin si vend të duhur për të gjetur këshilla për prindër, ka gjetur hulumtimi. /Telegrafi/