Maqedonia, në krizë të paramenduar politike

Kriza e paramenduar politike duket e thellë. Tallja në llogari të qytetarit bëhet pa një – pa dy. Pa llogari u bënë edhe ngjarjet në Kalanë e Shkupit, atje ku pësuan të rinjtë shqiptarë. Të rinjtë shqiptarë pa hesap u vranë edhe në Gostivar. Nëse për kalkulimet e fundit politike duhet të vritet ndonjë shqiptarë, atëherë nuk na duhet gjë. Çdo sferë e shtetit ku jetojmë dhe veçanërisht jeta politike në Maqedoni ,kanë kohë që nuk janë normale. Ky realitet jo normal ka zgjatur kaq shumë sa që fatkeqësisht për ata që kanë lindur në dy dekadat e fundit anormalja është i vetmi realitet qe njihet, propagandohet dhe pranohet si normalitet.

Demokracia në Maqedoni mbetet një aspiratë por jo realitet dhe kjo aspiratë ka gjasa të mos realizohet edhe për shumë kohë nëse refuzojmë t’i themi gjërat ashtu siç janë. Përgjegjësit kryesor për krizën politike në Maqedoni jemi ne që kemi lejuar për kaq kohë disa drejtues të klasës politike të përdorin një ligjërim hipokrit demokratik për të fshehur epshin e tyre për pushtet dhe pasuri.

Ligji për “branitellat” dhe refuzimi i të njëjtit për luftëtarët e UCK-së duhet të na shqetësojë shumë, sepse është tregues i frikshëm i natyrës totalitare të demokracisë së brishtë në Maqedoni që udhëhiqet nga Nikolla Gruevski. Hekuri rihet sa është i nxehtë. Ali Ahmeti duhet t’i bëj një shërbim të madh popullit nëse ai paraqet kërkesa të padiskutueshme në mbështetje të ushtarëve të UÇK-së, për të dëshmuar në të njëjtën kohë se ngjarjet e fundit nuk ishin një përpjekje e orkestruar nga ana e tyre për të fituar pikë politike. Nëse këto prova nuk materializohen, Ahmeti duhet të përballet me popullin.

Zgjedhjet në Maqedoni duhet të zhvillohen në përputhje me kohën, kur edhe do të planifikohen. Ata që kanë fituar votë drejtësisht nuk duhet t kenë frikë te përballen me elektoratin. Gjatë njëzetë viteve të fundit Maqedonia nuk ka zhvilluar asnjëherë zgjedhje të pakontestuara dhe të pastra. Në Maqedoni në disa zona gjatë zgjedhjeve votat me sa duket blihen dhe shiten ditën me diell me para në dorë, nga disa politikanë dhe anëtarë të familjeve të tyre. Askush nuk duhet të bie në baltën e këtyre prostitutave të demokracisë: ata duhen demaskuar pa asnjë hezitim.

Dhe, kjo nuk është e vështirë në kohën tonë kur çdonjëri prej nesh është një reporter falë celularëve. Kushdo që t’iu afrohet dikush që t’ju blej votën, fotografoni pa ndrojtje fytyrën kriminale të korrupsionit politik dhe përcilljani fotot mediave.

Demokracia në Maqedoni nuk do të konsolidohet pa një angazhim aktiv të qytetarëve në proceset demokratike. Ngjarjet e fundit në Libi, Egjipt dhe Siri, kanë treguar në mënyrë bindëse rolin e qytetarëve në sfidimin dhe heqjen qafe të regjimeve të korruptuara.

Definitivisht i duhet prerë rruga të keqes, për t’i dëbuar nga ushtrimi i kompetencave të gjithë keqbërësit.

Situata politike në Maqedoni tashmë e ka futur vendin në një stagnim të rrezikshëm ekonomik, politik dhe social. Si pasojë e krizës politike, treni i integrimit evropian duket se tashmë ka dalë plotësisht nga binarët. Pa dyshim që për këtë dhe të tjerat edhe opozita mbanë përgjegjësitë e saj.