Bota pas 1 Majit

Në 11 Shtatorin e 2001 pak kush do mund të besonte se Amerika, vendi më i fortë në botë politikisht, ekonomikisht dhe ushtarakisht do sulmohej në mënyrën më tragjike që nga sulmi japonez në Pearl Harbor. Do ishte kjo ditë që jo vetëm u shënua si dita e zezë e historisë amerikane, por hyri në analet e historisë si dita që ndërroi rrjedhën e zhvillimeve anembanë botës. Jo shumë kohë pas asaj ngjarjeje Osama Bin Laden dhe organizata që ai drejtonte Al-Qaeda do cilësoheshin si përgjegjëse për këto sulme që në një mënyrë apo tjetër sollën reagimin amerikan që rezultoi në dy luftëra dhe mijëra të vrarë.

Sot, gati 10 vjet pas asaj dite të kobshme, miliona dollarësh të shpenzuar për kapjen e Osama Bin Laden, qindra jetësh të humbura në radhët e pjesëtarëve të trupave speciale amerikane, dy luftërash dhe ndërkohë që Lindja e Mesme, Afrika dhe më gjerë janë përfshirë në një valë ndryshimesh rrënjësore politike, Presidenti Amerikan, Barak Obama, nëpërmes një konference për shtyp afër mesnatës së të dielës solli lajmin e shumëpritur : “Forcat special amerikane kanë kryer me sukses një operacion në Pakistan, ku Osama Bin Laden mbeti i vrarë”.

Lajmi që pritej prej vitesh, duket të ketë sjellë një ndjenjë ngushëllimi për shpirtrat e trazuar të atyre që humbën jetën ndër vite, një moment ngushëllimi për ato familje që sot nuk kanë në mesin e tyre pjesëtarët që u morën me forcë nga egërsia e errësirës me të cilën Al Qaeda organizoi sulmet në 11 Shtator dhe sulmet anembanë botës përgjatë këtyre 10 viteve. Ky moment ishte po ashtu një moment i gëzimit ndër ata qindra e mijëra qytetarë të botës demokratike që u mblodhën në Washington DC dhe New York menjëherë pasi lajmi zuri vendin kryesor në mediat botërore. Tashmë, kemi një realitet të ri.

Megjithatë, fakti që Bin Laden nuk është më nuk do të thotë se lufta kundër terrorizmit ka marrë fund apo është më e lehtë. Ky është një lajm i mirë, por është një moment nga i cili ngjarjet mund të kthehen në një negativitet nëse nuk menaxhohet siç duhet. Ajo që mbetet është shumë zhurmë për atë se si rrodhën ngjarjet pas momentit të parë të vrasjes së tij. Jo më shumë se disa orë pas ngjarjes dhe mediat amerikane janë mbushur me filozofi nga më të ndryshmet, përfshirë edhe filozofitë konspirative që nuk zënë vend lirshëm në logjikën e zhvillimeve të dekadës.

Por përveç ngushëllimit dhe gëzimit ndër radhët e liridashësve anembanë botës, publikimi i lajmit për vrasjen e Bin Laden sjell në dritë edhe një tjetër anë të medaljes. Cila do jetë e ardhmja e organizatës dhe veprimeve terroriste të individëve apo organizatave të tjera të lidhura me Al Qaeda sikurse janë Muslim Brootherhood apo Al-Shabbab?

Duke pasur parasysh se figura të tilla të një niveli si Bin Laden kanë efekt të jashtëzakonshëm në mënyrën e funksionimit ideologjik të grupimeve të caktuara, vdekja e tij mund të shërbejë si katalizator për ristrukturimin e shpejtë dhe vënien në veprim të akteve hakmarrëse. Kjo do ishte edhe mënyra më efektive për të mos lejuar rënien në tatëpjetën e disorganizimit që rrjedhimisht do sillte edhe shkatërrimin e organizatës. Një strategji e tillë do ndihmohej shumë edhe nga mundësia e manipulimit ideologjik me faktin se Bin Laden i rezistoi ndërhyrjes duke dhënë jetën për atë që ai e konsideroi kauza myslimane. Përkrahësit e tij do shihnin tek ky akt fytyrën e udhëheqësit të tyre shpirtëror, vetsakrifica e të cilit në emër të xhihadit shërben si motivim për brezat e tjerë.

Përveç këtij variant që ka gjasa të ndodhë, do duhet të konsiderohet edhe mundësia që eliminimi i kupolës organizative të Al Qaeda-s do të sjellë ç’orientim dhe pashmangshmërisht edhe një lloj dalje nga kontrolli i atyre elementëve të cilët vrasja e Osamas do duhet të shoqërohet me akte hakmarrëse. Jo rrallë, kemi parë se si grupime të niveleve të dyta apo edhe të treta në hierarkinë e organizimeve terroriste nëpër botë kanë marrë përgjegjësinë për akte dhune të kryera pa dijeninë e Al Qaeda’s por duke qenë të inspiruar nga thirrjet për xhihad që kjo e fundit u ka drejtuar audiencave të saj nëpër internetit apo videoregjistrimeve të transmetuara nëpër televizione.

Duke pasur parasysh se kush dhe si ka vepruar Al Qaeda në këto 10 vite, por edhe më parë që nga 1992, ka mundësi që variant i parë të jetë më i mundshmi dhe ku pasardhësi i Bin Laden të jetë përcaktuar nga vetë ai pasi duke pasur parasysh përkushtimin amerikan për kapjen ose eliminimin e tij pritej që një gjë e tillë të mund të ndodhte. Natyrisht se këto dy variante shmangin idetë e konspiracionit pavarësisht asaj që do mbizotërojë në ditët në vazhdim.

Osama Bin Laden tashmë është një subjekt që zyrtarisht në arkivat e gjendjes civile Saudite do ketë një datë lindjeje dhe datë vdekjeje. Jo vetëm kaq, por Osama bin Laden do kthehet në një udhëheqës shpirtëror vlera e të cilit për kauzën që ai themeloi është më e madhe tani sesa ç’ishte më parë. Momenti në të cilin ndodhi ky operacion, duke pasur parasysh ngjarjet e fundit ne Egjipt, Siri dhe Libi dërgon një mesazh të fortë kundër atyre që cilësojnë si armiqësore traditat dhe mënyrën e jetesës perëndimore, ashtu sikurse mund të kthehen në një moment të rrezikshëm të hakmarrjes së atyre që nuk njohin atributet e jetës dhe zhvillimit.