A po humbet shtresa e mesme sociale?

Jemi dëshmitare të vendimeve të fundit të qeverisë për ngritje të pagave për rreth 70 mijë punëtor të arsimit dhe administratës, i cili vendim thuhet se është në kundërshtim me marrëveshjen e FMN-së dhe MEF-it, e cila marrëveshje parashikon një rritje të mundshme të pagave vetëm prej 6 deri në 7 për qind. Vendimi është marrë për ngritje të pagave prej 30 deri në 50 për qind. A është dashur apo nuk është dashur të ketë një ngritje kaq të lartë të pagave sigurisht se shihet qysh në ditët e para pas nënshkrimit të marrëveshjes së mirëkuptimit me sindikatat e punëtorëve. Efektet anësore të këtij vendimi kanë filluar të japin rezultat ende pa dalë pagat e punonjësve më ngritje, duken të kenë ndikuar në ngritjen e çmimeve të produkteve bazë si mielli, sheqeri, vaji e shumë të tjera. Një vendim i tillë, një ngritje e pagave aq e lartë në mënyre të menjëhershme apo një investim kaq direkt në ekonominë e tregut, i cili sigurisht do të rritë nivelin e parasë në treg për rreth 80 milionë euro në vit, do të ndikoj në rritjen e çmimeve për të gjithë konsumatorët jo vetëm për ata të cilëve u janë ngritur pagat dhe do te shkaktoj vetëm inflacion.

E më e keqja e kësaj është, se sipas Entit të Statistikave të Kosovës, gjatë vitit 2010 Kosova ka pasur ngritje të importit të mallrave, apo më mire thënë kemi rritje të eksportit të parave të Kosovës në shtetet tjera për rreth 11.5 për qind më shumë se në vitin 2009, e cila po të kthehet në vlerë monetare i bie dikur rreth 210 milionë euro. Nëse e shohim raportin e Entit të Statistikave, kemi një deficit tregtar me 88% import dhe 12% eksport, ku nga kjo rrjedh se ato 80 milionë të cilat do të derdhen për pagat e punonjësve, dhe prej tyre do të paguhen pensionet që po humbin diku nëpër botë; do të paguhet TVSH-ja prej 16% dhe tatimet në paga, ku do të mbesin rreth 60 milionë që prapë do të eksportohen jashtë shtetit dhe do të kontribuonin në ekonominë e Serbisë, Maqedonisë e vendeve tjera.

Ajo që shumë pak po përmendet dhe e cila ka një efekt jashtëzakonisht negativë në ekonominë e vendit është se po krijohet një hendek në mes të shtresës së popullatës se pasur dhe shtresës së popullatës me varfëri të skajshme, në të cilin hendek po humb shtresa e mesme, e cila do të duhej të rritej sa me shumë, që të kishim një stabilitet ekonomik. Çka nëse një investim i tillë nuk do të bëhej në ngritje të pagave, por të ishte një 100 milionësh nga qeveria si stimulim për bujqësinë në vend, pra për stimulimin e prodhuesve vendorë? Si do të ndikonte? Sa do të ishte kthimi për ekonominë e vendit? Sigurisht se do të ishte një investim i pritur që një kohë të gjatë, dhe i cili investim do të krijonte vende të reja pune, do të krijonte mirëqenie sociale, dhe se me investime të këtij lloji në këtë kohë, do të kishte një varg efektesh pozitive në ekonominë e Kosovës, ku në mënyrë të drejtpërdrejt do të punësoheshin ata që jetojnë në varfëri të skajshme tek prodhuesit vendorë. Kështu tek të varfrit do të ngrihej mirëqenia sociale dhe në mënyrë të vazhdueshme ata do të afroheshin tek popullata e shtresës së mesme dhe kështu do të arrihej një stabilitet ekonomik, dhe shoqëria në përgjithësi do të ishte më e motivuar.

Për qeverinë do të ishte shumë më e lehtë që të shfrytëzoj potencialin e lënë pas dore, sepse në mënyrë automatike paratë të cilat qytetarët i paguajnë për produkte që vinë nga jashtë, para që dalin jashtë shtetit, do te mbeteshin brenda Kosovës dhe në këtë formë do të ngrihej mirëqenia sociale, buxheti i shtetit do të vinte duke u ngritur në mënyrë të vazhdueshme dhe sigurisht që me investime të tilla punëtorë e arsimit dhe administratës brenda një kohe shumë të shkurtër do të arrinte një page shumë më të lartë se sa ajo e cila i është ofruar tani me rritje.

(Autori është student i vitit të dytë në UBT – Prishtinë)