Statusi të harrohet, çështje e kryer!

Të mërkurën javës që shkoi, Parlamenti i Bashkimit Evropian ka ratifikuar Marrëveshjen e Stabilizim-Asocimit (MSA) ndërmjet Serbisë dhe Bashkimit Evropian, me këtë rast eurodeputetët e Parlamentit Evropian, miratuan edhe një rezolutë për Serbinë me të cilën konfirmohet se e ardhmja e këtij shteti është në Bashkimin Evropian.

Thirrjet e Bashkimit Evropian janë, që të nisë dialogu ndërmjet Republikës së Kosovës dhe Republikës së Serbisë, thirrje që thotë: Dialog po, por se nuk ka negociata për status, statusi i Kosovës është tashmë i qartë, këtë e ka thënë edhe Gjykata Ndërkombëtare e Drejtësisë me 22 korrik 2010 – opinionin këshillëdhënës lidhur me ligjshmërinë e shpalljes së pavarësisë së Kosovës në vitin 2008. Gjatë fjalës së tij Kryetari i Gjykatës Hiasashi Ovada tha se shpallja e pavarësisë së Kosovës më 17 shkurt të 2008 nuk e ka shkelur të drejtën ndërkombëtare. Me 10 vota pro dhe 4 kundër, gjykata ishte e mendimit se deklarata e pavarësisë së Kosovës nuk e ka shkelur të drejtën ndërkombëtare. Sipas gjykatës nga të gjitha të dhënat pavarësia e Kosovës nuk ka shkelur as rezolutën 1244, si dhe kornizën kushtetuese të UNMIK-ut. Prandaj, nuk ka vend për të negociuar për statusin.

Dialogu që pritet të fillojë ndërmjet Republikës së Kosovës dhe Republikës së Serbisë, duhet të fokusohet në krijimin dhe forcimin e raporteve fqinjësore, në forcimin dhe zhvillimin e paqes dhe demokracisë në rajon, si dy shtete paqësore dhe demokratike të jemi pjesë e kontributit, në forcimin e paqes dhe demokracisë në Evropën e Bashkuar.

Urrejtja nuk na shpije askund, bashkëpunimi po

Duke bashkëpunuar për hir të paqes dhe demokracisë, Kosova dhe Serbia, si dy shtete të pavarura dhe demokratike mund të janë shembulli më i mirë i paqes dhe demokracisë stabile në Evropën e bashkuar, dhe me gjerë.

Republika e Kosovë duhet te punoj dhe te angazhohet në forcimin dhe konsolidimin e shtetit, duhet ta shfrytëzoj avantazhin e saj pas vendimit të GJND-së, të punoj të angazhohet në prezantimin e zhvillimit të shtetit, dhe të kërkojë njohjen nga të gjithë shtetet anëtare të OKB-së. Institucionet e Republikës së Kosovës duhet të vazhdojnë të bashkëpunojnë me aleatët dhe miqtë tanë ndërkombëtar, Republika e Kosovës ka mungesë te përvojës diplomatike, dhe na duhet një përvojë afatgjate, për ta zhvilluar politiken e jashtme të Republikës.

Republika e Serbisë duhet të heqë dorë nga qëndrimet e saja karshi Republikës së Kosovës, duhet të pajtohet me realitetin e krijuar në Ballkanin e shekullit të ri, ta njohë Republikën e Kosovës, si fqinje e pavarur me kufijtë e sajë që i takojnë, me një qeveri demokratike, e aftë në ruajtjen e paqes dhe stabilitetit në Ballkan dhe më gjerë.

Republika e Serbisë duhet të jetë më praktike, dhe me këmbë në tokë, duhet të angazhohet në zhvillimin e politikave pro evropiane dhe në një të ardhme të afërt ta implementoj këtë kurs të politikave të Bashkimit Evropian. Për hir të paqes dhe demokracisë, si trashëgimtare juridike dhe shtetërore e qeverive të mëparshme serbe, të Beogradi zyrtar duhet të kërkojë falje publike ndërkombëtare, për krimet pafund të kolonializimit dhe terrorit shtetëror serb kundër shqiptarëve dhe kombit shqiptar tash e mbi njëqind vjet, dhe më këtë të pajtohet dhe ta pranojë rendin e ri që është krijuar në Ballkan.

Qeveria e Republikës së Serbisë duhet te hetoj dhe të tregoj, se ku gjenden trupat e mbi 2000 shqiptarëve, të arrestuar e të rrëmbyer me forcë dhe të zhdukur nga organet shtetërore të sigurimit. Familjarët e tyre duhet të dinë për të vërtetën e fatit të bijve dhe bijave të tyre. Për stabilitet dhe paqe ne Ballkan, Republika e Serbisë duhet ta ndërpres dhe ta ndaloj, me të gjitha mundësit ligjore dhe etike, çdo propagandë dhe veprimtari akademike, arsimore, kulturore kundër shqiptarëve dhe kombësive tjera në Republikën e Kosovës. Republika e Serbisë duhet te ndërpres çdo përkrahje, ekonomike apo politike, të strukturave paralele të saj në çdo hapësirë të Republikës së Kosovës.

Protokolli i Republikës së Kosovës, ekziston dhe si i tillë duhet të respektohet nga Republika e Serbisë. Çdo zyrtar serb që ka vendosur të vizitoj Republikën e Kosovës, paraprakisht duhet t’i njoftojë institucionet legjitime dhe demokratike të Republikës Kosovës, e jo të shkelën rregullat e lojës. Ta vendosim Paqen dhe rendin e ri, në Ballkanin evropian, për Evropën e bashkuar dhe paqësore! Serbia duhet ta njohë Kosovën.