Pa makina

Sot është Dita Botërore Pa Makina. Kësaj here edhe në vendin tonë disa organizata joqeveritare kanë menduar që ta implementojnë një fushatë dyorëshe për të shënuar simbolikisht ketë ditë, e që më se shumti i duhet kryeqendrës së Kosovës. Sipas disa statistikave policore, brenda ditës, në kryeqytetin e Kosovës hyjnë e dalin rreth 100 mijë automjete civile e zyrtare. Ora 7 e 30 minuta shënon paralizimin e trafikut në të gjitha hyrje-daljet e Prishtinës. Të duhet më tepër se një orë të presësh në kolonë në hyrje të qytetit, për të arritur deri në qendër! Për shumë kë në botë kjo nuk do të ishte e besueshme, mirëpo te ne ky realitet tanimë nuk përbën as lajm të zakonshëm. Pa dyshim jemi njerëz që përballojmë çdo vështirësi dhe nuk e kemi problem të presim me orë të tëra nëpër kolona makinash. Kohën sa qëndrojmë të bllokuar në trafik e shfrytëzojmë duke pirë duhan, duke kënduar e duke qeshur! Në këtë drejtim nuk kemi pikë faji, sepse ka kaluar një dekadë pas luftës dhe tashmë jemi pajtuar me realitetin e trazuar.

Zoti na ruajt! një aksident i rëndë trafiku po të ndodhë në hyrje të Prishtinës, njerëzit e lënduar mund të vdesin derisa autoambulanca t’i dërgojë në Emergjencë. Po ashtu njerëzit mund të vriten e të digjen derisa policia apo zjarrfikësit të arrijnë në vendin e ngjarjes. Komunikacioni rrugor në “metropolin” tonë të dashur është totalisht në gjendje të rëndë. Atij urgjentisht i duhet një infuzion. Policia rrugore e ka hartuar një plan operativ më qëllim të përmirësimit të situatës, mirëpo punimet në rrugë dhe numri i madh i automjeteve në qarkullim ua pamundëson atyre arritjen e dëshirës. Le të shpresojmë që me zgjerimin dhe arnimin e rrugëve të kryeqendrës ky kaos do të largohet njëherë e përgjithmonë dhe ne do të mund t’i kthehemi një jete normale, siç e bëjnë shumë popujt të botës.

Merreni me mend këto mijëra automjete që e shkelin Prishtinën brenda ditës sa karburantin e djegin dhe çfarë ndotje e ambientit krijohet në qytetin tonë të zhurmshëm. Nga kjo gjendje të gjithë jemi të rrezikuar dhe herët a vonë do ta pësojmë. Shumë qytetarë të Prishtinës, por edhe të qyteteve të tjera, pa përjashtim, edhe pse punën e kanë në derë të shtëpisë, të njëjtit nuk mund të mos e marrin me vete edhe veturën. A nuk do të ishte më mirë për shëndetin e tyre që të ecin ato pak metra dhe të mos shpenzojnë para në karburante? Ka edhe alternativa të tjera që mund t’i përdorim nëse nuk dëshirojmë të ecim këmbë. Pse të mos shkojmë me biçikletë deri në punë apo gjetiu, ose pse nuk i shfrytëzojmë autobusët e trafikut urban?

Është shumë e vërtetë që sot nëse dikush të sheh hipur në biçikletë, menjëherë vijnë reagimet e shoqërisë apo rrethit duke thënë: “Filani ‘kish rrëshqit prej arrës’”. Këtë mentalitet mund ta largojmë nëse lexojmë veç pak se si zhvillohet trafiku rrugor në qytetet evropiane. Derisa në vendet e moderuara, kryeministri, presidenti dhe zyrtarë të tjerë shteti shkojnë në punë me biçikleta e shumë herë edhe këmbë, pse kjo nuk ndodh edhe në vendin tonë të varfër, të paktën për njerëzit e rëndomtë.
E nisëm me Ditën Botërore Pa Makina dhe krejt në fund po e përfundojmë me një thirrje për të gjithë: “Të përdorim sa më pak makina dhe në vend të tyre të gjejnë forma alternative të qarkullimit!”