Gjyqet si “res mobiles”!

Fjala "mobil" përdoret dendur në jetën e përditshme, më tepër në kuptim të aparatit telefonik, celularit. Kjo fjalë rrjedhë nga latinishtja – mobiles, res mobiles (res – send, mobiles – i lëvizshëm), që do të thotë: send i lëvizshëm. Edhe gjyqet janë shndërruar në "res mobiles".
Pse?
Aty ku janë gjyqtarët, janë gjyqet, thonë gjykatësit. Në pjesën veriore të Mitrovicës, për ligjin, mbrojtjen e tij, kujdesen "njerëzit e EULEX-it", tre prokurorë dhe tre gjyqtarë.

Këtu për "shkaqe politike", tri ditë pas shpalljes së pavarësisë sonë, u "avulluan" prokuroritë dhe gjyqet, të nivelit komunal dhe të qarkut, por edhe Gjykata e Kundërvajtjes. Institucionet e përmendura u zhvendosën "përkohësisht" në komunën fqinje, jo larg në "vijë ajrore", Vushtrri. Ky "res mobiles" ndodhi për hir të politikës, demokracisë, ‘qetësimit të shpirtrave të trazuar", të mos hidhërohet Serbia.

Pas luftës, gjyqet "res mobiles" i kanë aplikuar gjykatësit e UNMIK-ut. Bie fjala, ish- pjesëtarët e UÇK-së, të akuzuar në Gjyqin e Qarkut në Prizren, me këtë "firmë" – gjyqi i tyre është mbajtur në gjykatën tjetër simotër, në Gjilan. Këtë luks e ka pasur gjykatësi, mauriciusi Vinod Boolello, i cili proceset i ka mbajtur, nën firmën e gjykatës së qarkut, edhe në lokalet e Gjykatës Supreme të Kosovës, ngase atu afër ka banuar. Ka bërë gjyq "ngat banesës së tij". Gjyqet janë mbajtur edhe në sallat e shtëpive të kulturës, në Prishtinë, por edhe në sallën e burgut në Dubravë…Njësoj si Boolello, kanë vepruar edhe kolegët e tij.

Serbia brenda një kohe të shkurtër ndërmori dy hapa. Hapi i parë – financimi i strukturave paralele në pjesën veriore të Mitrovicës, në shumë prej 42 milionë euro. Ndërkaq, hapi i dytë pasoi me emërimin e prokurorëve dhe gjykatësve, me "seli" në oazën e përmendur duke themeluar edhe "filialet" – në Shtëpcë, Gorazhdec, Graçanicë e Ranillug.

Politika ogurzeze e fqinjit s’është për tu nënçmuar. Beogradi "mat pulsin", pikësynim ka ripushtimin e pjesën veriore të Kosovës, të cilën de fakto e ka futur nën "sqetull". Fill pas këtyre "operacioneve politike", presidenti i Serbisë, Boris Tadiqi, kinse për kërshëndellat ortodokse, më 6 dhjetor, erdhi për vizitë në Manastirin e Deçanit. Në vend se t’i përmbahet kushtit, karakterit të vizitës – "private e fetare", ai doli jashtë "protokollit", sërish brenda një viti, në Deçan, i shoqëruar me truprojat, "gorillat" e tij që mbanin "armë të gjata", dërgoi mesazhin se flet në emër të "qytetarëve të Serbisë". Ai Kosovën e konsideroi si "livadh" të tij, e quajti "Kosovë e Metohi".

Pas vizitës së Tadiqit në Kosovë, aktivizohet politika e EULEX-it. Zëdhënësja e këtij misioni Christina Herodes paraqitet me deklaratën se "po shqyrtohet mundësia e dërgimit sa më të shpejtë të gjyqtarëve dhe prokurorëve" në pjesën veriore të Mitrovicës. Fjala është për "njerëzit e ligjit", vendësit, shqiptarë e serbë.

Lidhur me këtë çështje minstrja e Drejtësisë, Nekibe Kelmendi paraqiti idenë, iniciativën e saj, të sigurohet një linjë autobusi që do të dërgonte në veri gjykatësit dhe prokurorët, aty ku ishte selia e tyre, t’i dërgojë edhe pjesëmarrësit e procedurës, dëshmitarët, ekspertët dhe të interesuarit. Zëdhënësi tjetër i EULEX-it, Christopher Lamfalussy është për atë që në veri "të instalohet drejtësi për të gjitha komunitetet".

Ideja, formula e zonjës Kelmendi, kujtoj, është e paefektshme dhe si e tillë kompromituese për shtetin. Prokurori identifikon shtetin. "Shteti" të udhëtoj me autobus deri tek vendi i punës dhe ndonjë i krisur të hedhë gurë të autobus, kjo i kalon caqet e normales ! Ministrja e drejtësisë, zonja Kelmendi qenka ithtare e gjyqeve dhe prokurorive "res mobiles" !

Zotëri Lamfalussy kur përmend shprehjen "të instalohet drejtësia për të gjitha komunitetet", aludon tek banorët serbë, do të dakordohen ata, apo jo. Nëse serbët e kundërshtonë këtë drejtësi, puna shkon huq. Strukturat paralele, u mor vesh, nuk donë t’i shohin me sy prokurorët dhe gjyqtarët shqiptarë. Cila do të ishte zgjidhja e zyrtarëve të lartë të Eulex-sit në "sanimin e gjendjes"?, Dihet, misioni i tyre është sundimi i ligjit, i ligjeve të Republikës së Kosovës, ngase, ndryshe, çdo gjë do të ishte e pakuptimtë.

Derisa admirali amerikan Mark Fitzgerald strukturat paralele i cilësoi si kërcënim për sigurinë në Kosovë në një konferencë për media, në prani të komandantit të KFOR-it, Markus Bentler, ky i fundit flet se në fund të janarit priten reduktimet e aleancës ushtarake që drejton ai, në 10 mijë trupa. Fitzgerald e tha troç se paraqitja e strukturave paralele bie ndesh me Rezolutën 1244 të KS të OKB-së. Kambana bie për atë që ka vesh.
Politikanët tanë, që s’e heqin nga goja Mitrovicën, nuk ofrojnë zgjidhje konkrete, kundërvihen me deklarata politike.

Serbia, e cila e ka "mbushur kupën", e luan lojën , orvatet ta zhvendos çështjen madhore, procesin e njohjeve të reja të pavarësisë së Kosovës, me "spicat" e saja. Dy "margaritarët" e regjimit të Beogradit, financimi i strukturave paralele dhe emërimi i prokurorëve dhe gjykatësve në Kosovë, janë dëshmi për t’iu kundërvënë kësaj politike, atje ku duhet, në OKB, në seancën e saj të radhës që pritet të mbahet më 22 janar.