Loja e KFOR-it me Policinë e Kosovës!

Dy lajme të mira kanë “goditur” Prizrenin, në fillim të këtij muaji. Të dya lajmet janë lidhur me një emër-Nexhmi Krasniqi. Lajmi i parë ishte zgjedhja e tij në krye të Policisë në Prizren, ndërsa i dyti ishte mbrojtja e kredibilitetit të krijuar për nëntë vite dhe kompetencave të garantuar edhe me Kushtetutë të këtij institucioni.

I sapozgjedhur në postin e drejtorit të Policisë në Prizren, Nexhmi Krasniqi, për herë të parë në Kosovë, tregoi se si duhet të mbrohen kompetencat e krijuar dhe fituar me shumë sakrifica të një institucioni të vendit. Përkundër bashkëpunimit, që ka treguar për nëntë vite PK-ja në Prizren me Brigadën Shumëkombëshe të KFOR-it në këtë qytet, drejtori i sapozgjedhur i policisë, Krasniqi më shumë se një orë, javën që shkoi nuk lejoi njësitet e KFOR-it të ndërhyjnë në objektin e “Shtëpisë së Bardhë” dhe në Qendërn për Punë Sociale, ku ishte alarmuar rrejshëm se ishte vendosur një mjet shpërthyes.

Ai refuzoi që kontrollimi i objekteve në të cilat dyshohej për vendosjen e mjeteve shpërthyese, që të bëhet nga njësiti për çminim i KFOR-it. Por, ky refuzimi tij, zgjati vetëm deri në momentin kur KFOR-i, dhunshëm ndërhyri në “çminimin e bombave”, të cilat ishin “kurdisur” në shenjë revolte ndaj këtyre dy institucioneve nga një grua 33 vjeçare.

Kjo ndërhyrje e KFOR-it pa dëshirën e policisë me të drejtë revoltoi drejtorin Krasniqi, pasi që ajo ndodhi vetëm pak minuta para se të intervenoi njësiti i PK-së, që po sa kishte ardhur nga Prishtina.

Me këtë veprim KFOR-i, përveç që injoroi, ia mohoi edhe kompetencat Policisë së Kosovës. Alarmi i rrejshëm për vendosjen e mjeteve shpërthyese në objektin e dy institucioneve të Prizrenit, gjithashtu nxori në pah se PK-ja, edhe pas një viti të shpalljes së Pavarësisë së vendit dhe hyrjes në fuqi të Kushtetutës, fatkeqësisht nuk funksionon me kompetenca të plota dhe se ende i ka duart e lidhura për të vepruar sipas planeve dhe standardëve të veta.

Policia dhe Ministria e Mbrojtjes, pas kësaj ndërhyrjeje, duhet të ulën dhe t’i qartësojnë kompetencat me KFOR-in, në mënyrë që në të ardhëm të mos ndodhë një konflikt siç ndodhi javën e shkoi në Prizren. Intervenimi i dhunshëm i KFOR-it në dy objektet e institucioneve në Prizren, të cilat ishin “rrezikuar” nga “bombat” e 33 vjeçares, nuk duhet të shikohet si gjest human.

Pa anashkaluar kontributin e KFOR-it gjerman, që ka dhënë në stabilitetin e sigurisë në nëntë vitet e pasluftës në Prizren, ndërhyrja në kompetencat e PK-së, javën që shkoi më shumë e ka dëmtuar besimin dhe autoritetin tek qytetarët dhe bashkëpunimin e ndërsjellë me policinë. Zhgënjimi është krejt normal. KFOR-i në këtë rast e ka kryer një punë që nuk i ka takuar.

Në një komunikatë të lëshuar për media, KFOR-i ka pranuar se “nuk ka ndonjë nivel të shtuar të gatishmërisë për të intervenuar para dy apo tre minutave”. PO në këtë komunikatë të lëshuar për media, KFOR-i saktëson se njësiti për çminim (EOD), së pari shërben për aktivitetet e KFOR-it dhe për t’i ndihmuar institucionet e sigurisë në Kosovë.

Në bazë të këtij citimi, përfaqësuesit e KFOR-it, ndërkaq bien ndesh me veprimin e tyre që treguan javën e kaluar ndaj PK-së. Ata po ashtu tregohen shumë kontradiktor në vlerësimin e situatës. Thonë se “sikur të ishte intervenuar me kohë rreziku do të ishte evituar menjëherë”, ndërkohë që hetimet dhe zbulimi i rastit nga policia e Kosovës (jo nga KFOR-i), rezultoi se askush nuk ishte i rrezikuar nga ky alarm.

Pavarësisht ndërhyrjes së KFOR-it, PK-ja ishte sërish ajo që identifikoi dhe arrestoi të dyshuarën që kishte bërë thirje të rrejshme nga një kabinë në qytet. Policia zbuloi se e dyshuara këtë akt të rëndë e kishte bërë në shenjë revolte ndaj këtyre dy institucioneve për shkak moszgjidhjes së këtyre dy institucioneve të një problem social që kishte të bënte me strehim.

Jam shumë i bindur se policia e Kosovës, që në fillim ka dyshuar se alarmi ka qenë i rrejshëm dhe se në këto dy objekte nuk ka asgjë që rrezikon jetën e njerëzve. Logjika për të konstatuar se në këto dy objekte nuk ka pasur mundësi të ketë të vendosur ndonjë mjet shpërthyes ka qenë shumë i thjeshtë.

Dy objektet e “rrezikuara” nga një grua e moshës 33 vjeçare, sigurohen 24 orë nga punëtorët e sigurimit. Madje, në Kuvendin Komunal, asnjë person nuk mund të hyjë brenda nga punëtorët e sigurimit pa akreditim. Dhe e dyta në kohën kur policia ka marrë telefonatën e rrejshme për vendosjen e mjetit shpërthyes, përfaqësuesit e KFOR-it, po në këtë objekt kanë qenë duke zhvilluar një takim me kryetarin e Prizrenit, Ramadan Muja.

Prandaj, nga hyrën mjetet shpërthyese në këto dy objekte të institucioneve në Prizren?! KFOR-i dhe ekspertët e sigurisë të cilët kanë vlerësuar se drejtori i sapozgjedhur Nexhmi Krasniqi, ka rrezikuar jetën e qytetarëve ende nuk kanë dhënë ndonjë përgjigje. Policia, ndërkaq pavarësisht ndërhyrjes së KFOR-it në kompetencat e tyre, ka arrit menjëherë të zbuloi dhe identifikoi personin që kishte dhënë alarm të rrejshëm për vendsojen e mjetit shpërthyes.

Zbuluan nivelin i “rrezikshmërisë” që dy institucionet për më shumë se dy orë ishin “përballuar” nga një grua e revoltuar për mungesën e një vendi të strehimit. Enigma e vetme e gjithë kësaj ngjarjeje tashti ka mbetur vetëm vendimi i ndërhyrjes së KFOR-it në kompetencat e Policisë së Kosovës.