FIFA, skandali i vërtetë janë rrogat dhe shpërblimet

Vartësit e FIFA-s fitojnë më shumë edhe se punonjësit e Wall Street. 2 miliardë kanë qenë të ardhurat për 2014-ën, 1,9 shpenzimet e bëra.

Ryshfete, fonde të vjedhura, llogari bankare të fshehta. Në javët e fundit FIFA na ka dhuruar çdo lloj skandali dhe epilogu ka qenë dorëheqja e vonuar e presidentit të 20 viteve të fundit, Sepp Blatter.

Por ekziston një element, që nuk përbën një shkelje ligjore, që është ai më skandalozi. Një kompani amerikane, “Emolument”, ka krahasuar rrogat e vartësve të FIFA-s me ato të organizatave të tjera jofitimprurëse dhe diferencat e verifikuara janë mbresëlënëse.

Në 31 dhjetor të 2014-ës FIFA ka deklaruar se ka 474 vartës (në rritje nga 452 të 2013-ës) dhe se në atë vit kalendarik janë shpenzuar për rroga dhe shpërblime më shumë se 115 milionë dollarë, një rritje me 10% në krahasim me vitin paraardhës.

Megjithatë, skandali vihet re vetëm pasi merr makinën llogaritëse në dorë: 474 vartësit e FIFA-s fitojnë mesatarisht 242.000 dollarë në vit. Jo keq, veçanërisht nëse mendojmë se po flasim për një organizatë jofitimprurëse. Si rregull duhet të shërbejë për zhvillimin e futbollit në botë dhe si instrument i bashkëpunimit social.

Por, pas krahasimit të rrogave të bërë nga kompania amerikane “Emolument” me mijëra vartës të tjerë të organizatave jofitimprurësve në botë është zbuluar se mesatarja e të ardhurave e këtyre të fundit është 66.000 dollarë në vit.

75% më pak nga sa fitojnë banorët e “Pallatit të Futbollit” në Zyrih. Aspekti kurioz është se edhe punonjësit e Wall Street, ata që mendojnë për para 24 orë nga 24 dhe që janë pasqyruar shumë mirë nga Leonardo Di Caprio në kinema, fitojnë mesatarisht më pak se punonjësit e shoqatës bamirëse të futbollit ndërkombëtar: 194.000 dollarë, ose më saktë 25% më pak.

Në bilancin e fundit në dispozicion, atë të 2014-ës, zbulohet se FIFA ka arkëtuar 2 miliardë dollarë të ardhura dhe ka shpenzuar 1,9 miliard. Fonde që janë shpërndarë për të promovuar futbollin mes 209 federatave anëtare të organizatës.

Një biznes i jashtëzakonshëm ku, siç po tregojnë hetimet e Shteteve të Bashkuara të Amerikës dhe Zvicrës, përfshihen dhënia e ryshfeteve, shpërblime milionere pa arsye dhe aktivitete që nuk kanë asnjë lidhje me një organizatë jofitimprurëse. /Sport1.com/