Dy derbi në Ligën e Kampionëve: Liverpool-Inter dhe Arsenal-Milan

Është hedhur shorti për gjashtëmbëdhjetë ekipet e mbetura në Ligën e Kampionëve dhe ka nxjerrë disa derbi mjaft "armiqësorë". Temë më e nxehtë do të jetë Premierliga përballë Serie A, me dy ndeshjet kryesore në mes këtyre dy ligave, Arsenal-Milan dhe Inter-Liverpool. Barcelona, Manchester United dhe Chelsea do ta kenë relativisht më të lehtë, së paku nëse bazohemi në letra.

Ndeshja 1: Celtic kundër Barcelonës. Barcelona, tri sezone më herët, u eliminua nga ky ekip në garat e Kupës UEFA, fakt që duhet ta ketë parasysh gjiganti spanjoll.

Ndeshja 2: Lyon përballë Manchester United. Djajtë e Kuq mund të mendojnë se do ta kenë të lehtë me kampionin e Francës, por një lojtar si Karim Benzema mund të jenë shqetësim për anglezët.

Ndeshja 3: Schalke përballë Portos. Nga kjo ndeshje nuk ka favorit dhe të dyja ekipet do të luftojnë për të siguruar vend në tetëshen e fundit.

Ndeshja 4: Liverpool përballë Interit. Kjo është një prej ndeshjeve më të mëdha të këtij shorti dhe, Inter do të ketë një punë të vështirë në tentimin për të treguar sukses edhe në garat evropiane.

Ndeshja 5: Roma përballë Real Madrid. Edhe një udhëtim drejt Romës për Real Madridin, pasi që eliminoi Lazion në fazën e grupeve. Por, kësaj here do ta ketë shumë më të vështirë.

Ndeshja 6: Arsenal përballë Milanit. Kjo, padyshim, do të jetë ndeshja kryesore e këtij rrethi. Të rinjtë anglezë kundër “të moshuarve” italianë dhe sigurisht, Fabregas kundër Kaka!

Ndeshja 7: Olympiakos përballë Chelseat. Chelsea, ndoshta do ta ketë sfidën më të lehtë nga të gjitha ekipet e mëdha, pretendente për titullin e Kampionit Evropian.

Ndeshja 8: Fenerbahce përballë Sevillas. Nuk do të jetë e lehtë për klubin spanjoll, pasi që do të kenë një ndeshje të parë të vështirë kur do të udhëtojnë në Turqi. Megjithatë mbeten favorit.

Ndeshjet e para do të zhvillohen më 19 dhe 20 shkurt, ndërsa ato të kthimit më 4 dhe 5 mars. Inter do ta luajë ndeshjen e dytë më 11 mars, për shkak të konfliktit në stadium me Milanin.