Kapen 50kg marijuanë, tre në pranga

Tre persona u arrestuan të mërkurën gjatë një aksioni antikanabis të policisë së Përmetit, aksion i cili u finalizua me sekuestrimin e një sasie prej 50 kg marijuanë.

Ndalimi u bë në aksin nacional Tepelenë-Përmet, në hyrje të qytetit të Këlcyrës, ku patrulla e Përgjithshme e Komisariatit të Policisë Përmet, arrestoi transportuesit e marijuanës, vëllezërit Renato dhe Enea Kadilli, 26 dhe 27 vjeç, si dhe Jorgo Oshafi 33 vjeç po nga Pogradeci.

Burimet nga Policia e Përmetit, thanë se marijuana ka qenë e fshehur në dy automjetet ku qarkullonin të arrestuarit. Në sediljen e pasme të automjetit BMW me targa TR 05 30 N, i cili drejtohej nga Renato Kadilli, policia konstatoi dy çanta të mëdha shpine brenda të cilave kishte pako të mëdha të mbushura me lëndë narkotike të llojit marijuana.

Pas zbulimit të sasisë së parë të drogës, Policia e Përmetit, ndërhyri në një tjetër automjet që shoqëronte të parin, sërish një BMW me targa false UENDIK, e cila drejtohej nga vëllai tjetër Enea Kadilli. Ky i fundit, ka kundërshtuar fillimisht kontrollin fizik të mjetit nga ana e Policisë, madje ka ushtruar forcë ndaj patrullës policore. Për këtë, ai është arrestuar menjëherë së bashku me shoqëruesin tjetër të mallit narkotik, Jorgo Oshafi, raportoi Panorama.

Grupi hetimor si dhe specialistët e Sektorit Kundër Narkotikëve në Drejtorinë e Policisë së Qarkut Gjirokastër, pas kqyrjes së çantave të gjetura në automjet, konstatuan se në njërën çantë kishte gjashtë pako dhe në tjetrën nëntë pako të formatit të madh. Pakot ishin të mbështjella me letër ngjitëse ngjyrë kafe dhe pesha e tyre varionte nga 2-4 kg secila. Sasia e 15 pakove, rezultoi të kishte në fund, një peshë totale prej 50 kg marijuanë.

Tre të rinjtë, pohuan se mallin narkotik e kishin siguruar në një rreth të Shqipërisë së Mesme, por pa e identifikuar zonën. E gjithë droga, do të trafikohej drejt Greqisë nga pogradecarët përmes vijës së gjelbër kufitare në zonën e Leskovikut./Telegrafi/