Gjyqi ndaj Alket Rizait

Gjyqi i shqiptarit Alket Rizai në Athinë, ka pësuar një përmbysje të papritur, pas denoncimit të dëshmitares kryesore. Rizai akuzohet për një vrasjeje të dyfishtë në vitin 2006, për të cilën ai është dënuar dy here me burgim të përjetshëm në gjykatën e shkallës së parë.

Dëshmitarja në fjalë tha, se ajo jo vetëm që nuk ka njohur tek i akuzuari në sallën e gjyqit, personin që ka kryer vrasjen në lagjen “Peristeri” të Athinës, por për më tepër, ka deklaruar se ka pasur presion nga policia greke për të dëshmuar, se ka qenë Alketi, autori i këtij krimi.

Lajmin e bën të ditur gazeta greke “To Thema”, sipas së cilës, dëshmitarja mohon që Rizai është vrasësi, duke shpjeguar se autori i krimit ishte mbi 46 vjeç dhe për më tepër ka qëlluar me dorën e majtë, ndërsa Rizai përdor dorën e djathtë dhe në vitin 2006 ishte vetëm 32 vjeç.

Avokatët e tij shprehen tashmë se akuzat për këtë vrasje rrëzohen plotësisht dhe se shpresojnë se në seancën e radhës në 31 maj, gjykatësit do të ndryshojnë dënimet e gjyqit të shkallës së parë, të cilat janë marrë edhe të ndikuara nga dy arratisjet kinematografike me helikopter nga burgu i Korridallosë.

Për një prej këtyre arratisjeve spektakolare Rizai është dënuar me 28 vjet heqje lirie, ndërsa akuzohet edhe për një vrasje të një shtetasi grek në vitin 2003, për të cilën “Alki”, ashtu siç e thërrasin tashmë në rrethin e tij, nuk ka pranuar asnjëherë fajësinë, raportoi TCH./Telegrafi/