Policia e Shtetit: Jemi të angazhuar për përfundimin e procesit

Policia e Shtetit në një deklartë për shtyp, ditën e enjte, theksoi se strukturat e saj janë angazhuar tashmë për menaxhimin e fazës përfundimtare të procesit zgjedhor, që është sigurimi i Vendeve të Numërimit të Votave dhe shoqërimi i materialeve zgjedhore drejt Komisionit Qendror të Zgjedhjeve.

Sipas deklaratës, shërbimet e policisë vazhdojnë të përmbushin me profesionalizëm dhe korrektësi detyrat për garantimin e sigurisë pranë Vendeve të Numërimit të Votave, në funksion të akteve ligjore.

Gjatë gjithë kësaj faze, deri në ditën e sotme është kërkuar ndërhyrja e strukturave të Policisë së Shtetit me vendim të Komisioneve Zonale të Administrimit Zgjedhor apo Komisionit Qendror të Zgjedhjeve në 16 raste në shkallë vendi pranë Vendeve të Numërimit të Votave.

Pas rivendosjes së rendit konform rregullave dhe kundrejt vendimit përkatës të këtyre Komisioneve, punonjësit e policisë janë larguar sërisht jashtë këtyre ambienteve, duke vazhduar të qëndrojnë në gatishmëri të plotë për sigurimin e rendit e të qetësisë deri në përfundim të procesit. /Telegrafi/