Keqqeverisja pengon bashkimin

Në oda, lokale, rrugë dhe kudo që ndodhin mbi dy persona, pa më të voglin dyshim që biseda e përditshme është për ribashkimin e Shqipërisë, zhvillimin ekonomik, për pasigurinë politike, ndotjen e ambientit… Flitet për ndryshime që duhet të ndodhin në shoqërinë tonë.

A janë të mjaftueshme vetëm bisedimet, kur në fakt nuk ka ndryshime për të mirë në vepër. Gjërat përsëriten sikur mos të ishte biseduar fare: hidhen mbeturina kudo vend e pa vend, nuk vërehen ndryshime në ekonomi, nuk ka siguri politike, nuk ka zhvillim për të mirë në të gjitha sferat e jetës, pos faktit që korrupsioni dita-ditës rritet dhe përkeqësohet jeta e qytetarit.

Qytetarët gëzohen kur dëgjojnë që arrestohen keqbërësit; të korruptuarit; por gjithherë flitet se kur do të arrestohen "peshqit e mëdhenj"? Mu për këtë lindë pyetja: kush janë "peshqit e mëdhenj" dhe pse janë të padukshëm? Përgjigjja ime është kjo: ”Peshqit e mëdhenj” nuk do të zihen kurrë në këtë frymë politike! Sepse, "peshqit e mëdhenj” janë vetë ligjdhënësit (drejtësia), pushteti, parlamentarët, deri tek më i vogli person i komunarëve!

Të gjitha këto që u përmendën, janë fakte që masën e përgjithshme e kanë lodhur e stërlodhur…

Masa e përgjithshme dita-ditës po varfërohet ekonomikisht. Klasa politike dita-ditës po pasurohet. Kriminaliteti po rritet në të gjitha fushat e jetës. Pasiguria e madhe popullatën e ka frikësuar, e ka çoroditur, e kanë mjeruar dhe poshtëruar. Pra, kjo është ajo që dua të them: ky pushtet që është duke e sunduar vendin është jo legjitim, sepse është legjitimuar në mënyrë të jashtëligjshme, është legjitimuar thjesht me votën e vjedhur. Ky pushtet po zhvillon vetëm kriza e pa siguri.

Të gjitha këto që thashë janë faktori kryesor që pengojnë rrugën e ribashkimit të Shqipërisë. Kjo klasë e pushteteve andej dhe këndej Shqipërisë natyrale prioritet nuk e kanë zhvillimin e shtetit. Prioriteti i tyre, qëllimet e tyre janë vetëm pasurimi individual me çdo formë të mundshme dhe të jashtëligjshme!

Nuk do ketë ndryshime derisa nuk vetëdijesohemi; derisa shumica e masës nuk depolitizohet dhe t’i thotë jo korrupsionit, jo hajdutëve të votës, stop poshtërsive e tradhtive kombëtare që bëhen në emër të shumicës (popullit).

Ja një shembull i marrëzisë që ndodhi me dy policët tanë të zënë rob nga xhandarmëria serbe nga marrëveshjet e pushtetit të paligjshëm të një pjese të Shqipërisë natyrale me Serbinë, konkretisht të Edita Tahirit me Borko Stefanoviçin, për kontrollimin e kufirit me Serbinë. “Kontroll i përbashkët"? Posi, se jo mahi, vetëm se ishin policët tanë të shtrirë për dhe me fytyrë në dushk, të poshtëruar dhe thellë të goditur në moralin gjithë-shqiptarë.

Këto janë marrëveshjet e pushtetarëve të pushtetit të paligjshëm. Këto janë marrëzirat e këtyre pushtetarëve; këto janë tradhtitë që dita-ditës po dalin mbi sipërfaqe.