Opinione

“Çdo popull meriton qeverisjen që ka”

Çfarë kam bërë dhe çfarë po bëj për shtetin dhe për kombin? Këtë pyetje ja bëj çdo ditë vetes time. Shpesh më duket vetja i pafuqishëm që s’po mundem të bëj asgjë në këtë drejtim, edhe pse jam shumë aktiv si në çështjen kombëtare po ashtu edhe në ato shtetërore, por prapë se prapë po më duket se pak po bëj dhe po e ndiej veten të pafuqishëm të bëj diçka më shumë.

Nganjëherë them këto shkrime që i shkruajmë ne analistët vallë ky popull a i lexon, apo ne analistët shkruajmë vetëm t’i lexojmë shkrimet e njëri-tjetrit, se ky popull nuk lexon dhe këtij populli nuk po i intereson se çfarë po bëhet tek ne dhe me të ardhmen e tyre.

Çdo ditë shoh se si pushtetarët dhe elita politike si në Kosovë dhe në të gjitha hapësirat mbarëshqiptare abuzojnë me politiken, me demokracinë, me lirinë dhe të drejtat e këtij populli, paranë publike, me mediat, abuzojnë me donacionet nga jashtë, me pronat, me pasurinë kombëtare, abuzojnë me ndjenjat kombëtare të shqiptarëve, me tokat shqiptare dhe ju falin tokat tona “fqinjëve” tanë grabitqar, e ne çfarë bëjmë, vetëm rrimë dhe heshtim, e kur vije koha e zgjedhjeve dalim dhe prapë i votojmë.

Derisa pjesa më e madhe e shqiptarëve jetojnë në varfëri dhe mezi arrijnë të sigurojnë ekzistencën, politikanët tanë bëjnë një jetë superluksoze hollivudiane me paratë e shqiptarëve, dhe më dhemb shpirti që nuk po mund të bëj asgjë që këto dukuri negative që po i shkatërron shqiptarët t’i parandaloj dhe t’i eliminoj. Pranojmë çdo gjë që na serviret nga bashkësia ndërkombëtare që janë në dëm të çështjes sonë kombëtare, dhe ne populli heshtim dhe i lejojmë klasën tonë politike t’i pranojë këto gjëra.

Çuditem me këtë popull se si lejon që një grup politikanësh të abuzojnë dhe të tallen me ta, e nuk ngrihet në revoltë gjithëpopullore. Në gjithë botën pushteti dhe politikanët frikohen nga populli, kurse te ne ndodhë e kundërta, populli frikohet nga politikanët. Aq shumë kjo klasë politike e paska frikuar popullatën e vetë që po ka frikë të protestojë kundër tyre që çdo ditë po abuzojnë dhe po i varfërojnë ata. Duke e parë frikën e popullatës që ka kundrejt politikanëve të vetë, me të drejt mund të them që është instaluar një “demokraci diktatoriale” – nga jashtë duket që ka “demokraci”, kurse përbrenda “diktaturë”.

Shpesh them sikur të kisha një lëvizje kombëtare ku do të kisha të rreshtuar pas vetes një armatë prej mbi 50000 të rinj, dhe me një “revolucion paqësor” do t’i kisha ndryshuar gjërat në të mirë të kombit, por prapë s’kam lënë pa i bërë pyetje vetes se a do kisha arritur që t’i rreshtoj pas vetes mbi 50000 të rinj që të ja arrij këtij qëllimi, edhe pse dihet që jemi popullata më e re në Evropë dhe matematikisht këtë shifër nuk do të ishte fare problem për ta bërë. Dhe prapë kthehem dhe e pyes veten, pse s’po mund të bëj asgjë në këtë drejtim, pse, pse, pse? Por prapë kthehem dhe them, se vet jemi fajtor dhe e meritojmë këtë klasë politike që po na shtyp dhe po na vjel çdo ditë e më shumë. Këto janë pyetjet që çdo ditë ja parashtroj vetes.

Është edhe ajo thënia e famshme që përdoret shpesh “Çdo popull meriton qeverinë dhe politikanët që ka”. Me plot të drejtë përdoret kjo thënie e famshme, dhe si duket neve shqiptarëve na përshtatet shumë. Në një thënie tjetër thuhet; “asnjë populli nuk i bëhet padrejtësi, në krye të tij do të vihet një sundimtar që ai popull e meriton”. A meriton ky popull, politikanë dhe qeverisje më të mirë, nga mllefi duke parë se si ky popull është vu në gjumin dimëror të arushave dhe hesht për çdo gjë… Them se jo, nuk meriton politikanë dhe qeverisje më të mirë. Vërtetë që ky popull e meriton qeverinë që ka.

Po e citoj edhe një thënie tjetër; “Po nuk u mundua ai popull të ndryshojë diçka (për mirë), Ne nuk e ndryshojmë qeverisjen/gjendjen e tij”. Kjo do të thotë që së pari duhet të ndryshojë populli, e pastaj do të ndryshojnë politikanët dhe qeverisja. Nuk duhet harruar që ndryshimi fillon së pari nga vetja.