Ekzekutivit në Shtime për herë të tretë i dështon tenderi i druve për shkolla

Ekzekutivi në Komunën e Shtimes që drejtohej nga Qemajl Aliui i Lëvizjes Vetëvendosje, prej disa muajve po përballet me finalizimin e procedurave për dhënien e tenderit të druve për furnizim të shkollave. Për herë të tretë tenderi është pezulluar të hënën, ndërkohë gjendja në terren me lëndë djegëse nëpër shkolla është duke u vështirësuat dita-ditës, teksa në një rast prindërit janë aktivizuar për ta furnizuar një shkollë me dru.

Në një vendim të së hënës të Komunës së Shtimes të cilin e ka siguruar telegrafi nga burime të sigurta, thuhet se aktiviteti i prokurimit për furnizim me dru për institucionet e komunës së shtimes, kontratë kornizë për 24 muaj, është pezulluar më datë 25.11.2024.

‘’Pas pranimit të kërkesës për rishqyrtim nga operatori Ekonomik, ‘’N.T Berveniku’’, pezullohet aktiviteti i prokurimit: Furnizimi me dru për institucionet e Komunës së Shtimes. Pezullimi bëhet në pajtim me nenin 108/A, zgjidhja preliminare e mosmarrëveshjeve, të ligjit nr.04/L-042 për prokurimin Publik të Republikës së Kosovës, i ndryshuar dhe i plotësuar me ligjin Nr. O4/-237,  ligjin Nr.05/-168 dhe ligjin nr. 05/L -092 dhe në pajtim me legjislacionin sekondar F03 Rregullat për parashtrim të ankesave, neni 6 pezullimi i aktivitetit të prokurimit, 6.1 Ushtrimi i kërkesës për rishqyrtim automatikisht pezullon procedurën e prokurimit dhe në këtë rast Autoriteti kontraktues, respektimit zyrtari përgjegjës i prokurimit, duhet të njoftoj me shkrim të gjitha palët e interesuara lidhur me pezullimin e procedurës në fjalë’’, thuhet në njoftim.

Rreth kësaj çështje të hënën ka reaguar opozita, Partia Demokratike e Kosovës, dega në Shtime.

Ky subjekt e ka cilësuar si deshtimi i “qeverisjes” së Qemajl Aliut për të siguruar dru për ngrohje,

‘’Njoftojmë se pas situatës së rënduar, prindërit po i furnizojnë shkollat me dru. Situata e rëndë që po kalojnë shkollat në komunën e Shtimes është një dëshmi e dështimit të institucioneve për të siguruar kushtet minimale  të nevojshme për nxënësit dhe mësimdhënësit gjatë dimrit. Komuna ka dështuar në detyrën e saj për të siguruar dru për ngrohje në institucionet komunale duke lënë shumë shkolla, përfshirë edhe “Lasgush Poradeci” në Muzeqinë, paralelja e ndarë në Rashincë’’, thuhet në reagimin e PDK-së.

Sipas këtij subjekti në një përpjekje për të mbajtur procesin mësimor në këmbë, në Rashincë, një prind ka dhënë një donacion me një kamionetë me dru,

‘’ Ky prindër ka treguar solidaritet dhe vullnet për t’i dalë në ndihmë shkollës, duke u angazhuar që të mos ndërpritet mësimi. Ky veprim është një shembull i shkëlqyer i angazhimit. Ky është një skandal  i madh dhe një rikthim i frikshëm në vitet ’90–’99, kur në mungesë të mundësive dhe nën trysninë e regjimit, qytetarët ishin të detyruar të siguronin dru për ngrohje dhe kushte jetese, vetëm për të mbajtur shkollat dhe institucionet funksionale. Qeverisja e Qemajl Aliut po dëshmon se është e dëmshme dhe sa më parë duhet të japin përgjegjësi edhe para qytetarëve si dhe para organeve të drejtësisë’’, thuhet në reagimin e PDK-së.

Në anën tjetër, drejtoresha e Arsimit në Komunën e Shtimes, Yllka Fejzullahu, nuk ka qenë e qasshme gjatë së hënës, ndërkohë ajo nuk u është përgjigjur as pyetje të telegrafit lidhur me këtë çështje. /Telegrafi