Për Kosovën, si amanet!

Kosova s’ka përse të konsiderohet amanet as i Hashim Thaçit, Albin Kurtit, Isa Mustafës, Ramush Haradinajt, Fatmir Limajt … dhe shumë të tjerëve si këta. Shteti nuk është pronë private, që mund t’i lihet amanet dikujt.

Deklarata se Kosova është amanet përbën demagogji dhe si e tillë është plotësisht populiste. Prononcimet e këtilla janë tipike për politikanët që politikën e shohin si agjendë personale, që i shërben interesave tribale.

Shteti i Kosovës (institucionet e saja), më tepër se amanet përbën një mjet, një instrument që duhet të jetë në shërbim të rritjes së mirëqenies sonë, neve që jetojmë këtu çdo 24 orë në çdo ditë të javës. Ikja e madhe e shqiptarëve nga Kosova është tregues që jeta këtu është bërë e padurueshme, e vështirë. Nuk është e lehtë të jetohet në një mjedis ku institucionet e shtetit janë kapur nga një grusht njerëzish, që pandërprerë na shesin demagogji dhe patriotizëm arkaik. Nuk jetohet nga parullat nacionaliste, demagogjike dhe populiste si kjo e ‘amanetit’.

Shumë mund të mos pajtohen me mua, por, kështu siç e kanë përmbysur jetën tonë këta politikanë, e kanë kthyer Kosovën në një vend me pak perspektivë dhe shpresë. Kjo gjendje e detyron pjesën më të shëndoshë të kësaj shoqërie të mos mendoj tjetër gjë, përpos ikjes.

E, fajin pse kjo është kështu nuk e kanë qytetarët e thjesht. Faji qëndron tek kjo kastë e papërgjegjshme politike, që po vazhdon të kalërojë pa pikë turpi mbi ndërgjegjen tonë individuale dhe kolektive.