1 në 10 të rinj ka bërë një video me seks

Prindërit mund të ‘falënderojnë’ Paris Hiltonin, Kim Kardashianin, Pamela Andersonin dhe të tjerë. Falë tyre, videot me seks janë bërë diçka e zakonshme, deri në atë pikë sa, sipas studimeve, 1 në 10 të rinj ka bërë një të tillë...

Teknologjia është bërë pjesë e seksualitetit të të rinjve? Me sa duket, po. Të rinjtë janë rritur me celularë, internet e rrjete shoqërore dhe kjo pasqyrohet në jetën e tyre të përditshme, duke filluar nga jeta seksuale. Videove porno tradicionale u janë shtuar tashmë shfaqjet ‘live’ seksuale, ku mund të shohësh një person të zhvishet para kamerës të tij. Kjo nuk është aspak e jashtëzakonshme, vetëm se profesionistët e pornos ua kanë lënë vendin të rinjve që nuk stepen fare para gjërave të tilla. Janë ata tani që bëjnë shfaqje dhe zhvishen për të dashurën apo për të dashurin, ose thjesht për të zbavitur të tjerët dhe për të rënë në sy. Sipas një studimi të bërë në Francë, 20% e të rinjve kanë parë një shfaqje live seksuale dhe 16%, kanë bërë një të tillë.

Të rinjtë janë më të çliruar sekualisht dhe më të prirur për të guxuar. Në këtë moment, është në modë videoja seksuale; mjafton të filmohesh gjatë seancave të seksit me një kamera të thjeshtë. Sipas studimeve, 1 në 10 të rinj ka bërë një video të tillë me një ose shumë partnerë seksualë. Gjithashtu, 40% e të rinjve ëndërrojnë të bëjnë një të tillë.

Megjithatë, kjo praktikë nuk është pa rreziqe sepse…
– Videoja që i ka eksituar për 5 minuta, mund t’i bëjë të dridhen nga frika gjithë jetën.
– Nuk dihet kurrë nëse partneri do të vendosë ta hedhë videon në internet dhe kjo të kthehet në një shantazh.
– Nëse videoja publikohet në internet, të rinjtë mund të përjetojnë një kalvar të vërtetë: poshtërime, tallje, shantazhe ose kërcënime.
– Një video seksi nuk është kurrë e padëmshme, aq më tepër sepse asgjë nuk fshihet përfundimisht nga interneti. Do të ekzistojë gjithmonë dikush për ta ripostuar videon.
– Kontrollimi i imazhit në internet është bërë i ndërlikuar, bile i pamundur për këta të rinj që janë mësuar të ekspozohen.

Vitet e fundit janë shtuar shumë rastet e të rinjve që kanë vrarë veten për shkak të publikimit të videove intime, ndaj, ju lutemi, kujdes! /Telegrafi/