Dosja e Prokurorisë: I arrestuari për sulm ndaj pjesëtarëve të KFOR-it në Zveçan me ‘stupc’ në dorë

Policia e Kosovës sot ka arrestuar të dyshuarin Nenad Orloviq, i njohur me nofkat “Nemac” dhe “Rusi” për sulm ndaj KFOR-it në Zveçan më 29 maj.

Më 29 maj 2023, të lënduar kishin mbetur rreth 30 ushtarë të KFOR-it gjatë tentimeve për t’i shpërndarë protestuesit e grumbulluar pranë objektit komunal në Zveçan.

KALLXO.com ka parë dosjen hetimore të personit të arrestuar gjatë ditës së sotme.

Në fotot që ka siguruar KALLXO.com shihet personi i cili pretendohet se ka qenë pjesë e operacionit me një shkop të drurit në dorë.

Burime brenda Prokurorisë kanë thënë se këto prova janë në dosjen e hetimeve dhe se fotot janë dorëzuar sot nga Policia e Kosovës në Prokurorinë Speciale.

Personi i njëjtë besohet se ka qenë pjesë e protestës në Zveçan dhe këto foto të publikuara nga Kallxo.com janë pjesë e dëshmisë.

Sipas burimeve brenda Prokurorisë, personi i njëjtë po ashtu është identifikuar si pjesë e disa prej problemeve tjera që kanë ndodhur në veri të Kosovës, përfshirë ngjarjet me barrikada ku një person i ngjashëm, i maskuar, shihet afër një kamioni. Në dosjen e hetimit pretendohet se është personi i njëjtë.

Ky është personi i katërt që është arrestuar nën dyshimet për sulm ndaj gazetarëve e pjesëtarëve të KFOR-it gjatë tensioneve në veri që nisën që nga 26 maji.

Lidhur me këto arrestime, përfaqësuesi i BE-së, Josep Borrell, është shprehur i alarmuar.

Më 13 qershor, Policia e Kosovës kreu një aksion në Mitrovicë të Veriut, ku arrestoi Millun Millenkoviq.

Ministri i Punëve të Brendshme, Xhelal Sveçla, tha se i arrestuari dyshohet se ka qenë një prej organizatorëve të ngjarjeve në Zveçan më 29 maj.

Një ditë pas kësaj, tre pjesëtarë të Policisë së Kosovës u arrestuan nga forcat serbe në veri të vendit me pretendimin se të njëjtit kishin kaluar kufirin. Kjo është cilësuar si rrëmbim nga Qeveria e Kosovës e cila ka publikuar fotografi nga terreni duke argumentuar se policët kanë qenë brenda territorit të Kosovës. Ndaj tyre, autoritetet serbe kanë shqiptuar masën e paraburgimit prej 30 ditësh.

Protestat në Zveçan, Leposaviq dhe Zubin Potok në veri të Kosovë filluan më 26 maj, kur grupe të serbëve lokalë u grumbulluan para objekteve komunale për të protestuar kundër hyrjes së kryetarëve të rinj shqiptarë të Zveçanit, Zubin Potokut dhe Leposaviqit në to.