Çështja e mjedisit, thirrje publike për partitë politike

Organizata “Let’s Do It Kosova” u ka bërë thirrje publike partive politike që në programet e tyre qeverisëse për zgjedhjet e 11 qershorit, të përfshijnë më shumë çështjet mjedisore në Kosovë.

Sipas kësaj organizate, për vite me radhë, problemet e mjedisit ndonëse mjaft të theksuara janë lënë anash nga institucionet.

Ata në një komunikatë për media thonë se mungesa e zbatimit të ligjeve për mjedisin dhe mungesa e infrastrukturës janë vetëm dy nga problemet me të cilat përballet Kosova në trajtimin e problemeve mjedisore.

“Andaj, si organizatë për mbrojtje të mjedisit u bëjmë thirrje subjekteve politike që në programet e tyre qeverisëse të planifikojnë rritjen e buxhetit për mjedis, stimulimin e investimeve në industrinë e riciklimit, duke hartuar politika favorizuese për kompanitë recikluese, përmirësimin e infrastrukturës për mjedisin dhe hartimin e strategjive për vetëdijesimin e qytetarëve për problemet e mjedisit me të cilat përballet Kosova. Organizata ‘Let’s Do It Kosova’ ka hartuar strategjinë me rekomandime për zgjidhjen e problemeve të mjedisit, të cilën mund t’ua ofrojë partive politike, në mënyrë që në program të tyre, çështjet mjedisore të kenë prioritet më të madh. Let’s Do It Kosova vazhdon të jetë e përkushtuar jo vetëm në adresimin tek institucionet të problemeve mjedisore, por edhe ndërmarrjen e hapave konkret për zgjidhjen e tyre, siç është mobilizimi i qytetarëve në organizimin e aksioneve të shumta, për largim in e mbeturinave nga deponitë ilegale të mbeturinave”, thuhet në komunikatë.