Pagat e futbollistëve mund të jenë një nga kërkimet më të njohura në Google, pasi fansat e këtij sporti janë të prirur të dinë se sa fitojnë në vit idhujt e tyre.

Shumica e skuadrave mund të mos zbulojnë shifrat e sakta që po shpenzojnë në paga, por gazeta Marca ka mbledhur të gjithë informacionin rreth lojtarëve më të paguar në pesë ligat kryesore.

Pagat e publikuara nga gazeta spanjolle të gjitha janë në pagat bruto dhe jo neto, teksa më poshtë ka dhënë edhe shpjegimin rreth tyre.

Paga bruto vs paga neto

Paga bruto është ajo që paguan klubi para taksave, ndërsa paga neto është shifra që një lojtar fiton pas taksave. Dhe barra tatimore, natyrisht, ndryshon në varësi të vendit.

Klubet spanjolle paguajnë taksat më të mëdha, ndërsa klubet e Bundesligës paguajnë vetëm 15 dhe 20 për qind të pagave të lojtarëve të tyre për taksat.

Dhjetë futbollistët më të paguar në botë në vitin 2022 – Messi dhe Ronaldo humbin primatin Dhjetë futbollistët më të paguar në botë në vitin 2022 – Messi dhe Ronaldo humbin primatin

Dominimi i PSG-së në Ligue 1

Nuk është për t’u habitur që tre të parët e fituesve më të mëdhenj në Ligue 1 luajnë te Paris Saint-Germain, me Neymar dhe Lionel Messi që renditen të parët, ndërsa gjithashtu janë dy futbollistët më të paguar në Evropë.

Kontrata e Neymar u rinovua në vitin 2021 (deri në 2025, me opsionin e zgjatjes së saj edhe për një sezon) me një ulje progresive të pagës çdo sezon. Aktualisht ai fiton 49 milionë euro bruto, pra 30 milionë euro pas taksave.

Megjithatë, rasti i Messit është i ndryshëm, dhe megjithëse paga e tij është më e ulët se ajo e brazilianit në bazë fikse, ai mund ta rrisë atë me bonuse.

Çfarë do të thotë kjo? Messi nuk ka marrë asnjë bonus nënshkrimi, por ai ka një ‘bonus besnikërie’ prej 30 milionë euro bruto që do të paguhet një muaj pas përfundimit të afatit kalimtar të verës.

Reprezentuesi francez dhe objektivi i transferimit të Real Madridit, Kylian Mbappe vjen i treti, me kontratën e tij që përfundon në qershor të këtij viti.

La Liga në një pozicion të mirë – Bale më i paguari

Pavarësisht largimeve të Cristiano Ronaldos, Messit dhe Neymarit, gjigantët e La Liga Santander, Real Madrid, Barcelona dhe Atletico Madrid dominojnë shifrat e pagesave për pagat në Spanjë.

“Për çështjen e taksave, nuk ka asgjë për të bërë. Është një çështje shtetërore. Në Spanjë, një përmirësim i taksave nuk do të konsiderohet”, ka thënë gazetari i Marca, Jose Felix Diaz.

Për të dhënë një shembull, një futbollist që luan te Real Madridi duhet të paguajë 45.50 për qind të pagës së tij në taksa, ndërsa kjo normë është vendosur në 50 për qind në Barcelonë.

Asnjë lojtar i La Ligas nuk fiton më shumë se Gareth Bale, me Antoine Griezmann që vjen i dyti, i ndjekur nga Eden Hazard.

Sergio Busquets është lojtari më i paguar i Barcelonës, ndërsa Gerard Pique dhe Jordi Alba së fundmi ranë dakord të modifikojnë pagat e tyre duke pranuar ulje.

Liga Premier është ende në krye – Ronaldo kryesor listën

“Liga Premier ka qenë deri tani kampionati që e ka përballuar më së miri pandeminë. Ka shërbyer për të distancuar më tej veten nga ligat e tjera financiarisht”, ka shpjeguar për Marca gazetari Juan Corellano.

Në Angli, ndryshe nga La Liga për shembull, nuk ka kontrolle financiare dhe klubet lejohen të shpenzojnë më shumë se 100 për qind të asaj që fitojnë.

Pavarësisht se ka marrë një ulje rroge për t’u bashkuar me Manchester Unitedin, Cristiano Ronaldo është ende lojtari më i paguar në Ligën Premier, përpara Kevin De Bruyne në vendin e dytë.

Pas tyre vijnë emra si David De Gea, Raphael Varane dhe Jadon Sancho.

Bayern Munich sundon në Gjermani

Bayern Munich po dominon brenda dhe jashtë fushës në Gjermani dhe konsiderohet të jetë sërish favorit për të fituar Bundesligën.

“Klubet e tjera gjermane kanë vetëm dy mundësi për t’u afruar me ofrimin e pagave që paguajnë në Mynih: bast afatgjatë me një projekt financiar dhe sportiv që është i gatshëm të vuajë për disa vite derisa të arrijë soliditetin, prestigjin dhe suksesin; ose të marrin investime të jashtme, një injeksion të madh parash, që i lejon ata të bëhen gjigantë brenda natës (e pamundur me rregullin 50:1)”, ka thënë për Marca gazetari Daniel Martinez.

Pavarësisht dominimit të tyre të pakompromis, Bayerni së shpejti do t’i duhet të përballet me rinovimet e kontratave që po bëhen më të ndërlikuara për shkak të rritjes së vazhdueshme të pagave.

Lojtari më i paguar në Bundesliga vazhdon të mbetet sulmuesi Robert Lewandowski.

Itali: ‘Dekreti i rritjes’ dhe një krizë e gjatë – Juventusi dominon listën e pagave

Futbolli italian nuk po kalon momentin më të mirë, pavarësisht shfaqjes së investitorëve të shumtë të huaj në Milan, Inter, Fiorentina, Roma dhe Atalanta.

Klubet e Serie A nuk mund të konkurrojnë me skuadrat e mëdha evropiane në aspektin financiar, duke qenë liga që nuk ka asnjë lojtar në top 30-shen e më të paguarve në Evropë.

Një nga çështjet e mëdha është i ashtuquajturi ‘Dekreti i rritjes’, pasi klubet përfitojnë nga ky lehtësim taksash për të nënshkruar lojtarë nga jashtë dhe mund të paguajnë më pak taksa për ta.

Për shembull, Matthijs de Ligt i Juventusit është lojtari që fiton më shumë për sezon në Serie A, duke marrë tetë milionë euro plus bonuse pas taksave.

Megjithatë, Juventusi po paguan më shumë për lojtarët e tjerë, diçka që po ndodh edhe me sulmuesin e Milanit, Zlatan Ibrahimovic, paga e të cilit gjithashtu ka të drejtë për këtë ulje.

/Telegrafi/