Një burrë amerikan goditet për vdekje nga një makinë teksa ndihmonte rosat të kalonin një kryqëzim në një rrugë të Kalifornisë

Një burrë nga Kalifornia, i cili vdiq pasi u godit nga një makinë, u pa duke ndihmuar një grup rosash të kalonin rrugën disa momente para përplasjes, tha policia lokale.

Casey Rivara, 41 vjeç, la automjetin e tij përpara se të goditet nga një shofer adoleshent në Rocklin, rreth 25 milje (40 km) në verilindje të Sacramento, tha policia e qytetit, shkruajnë mediat e huaja, përcjell Telegrafi.

Rivara siguroi që rosat të arrinin të sigurt përpara përplasjes, thanë dëshmitarët.

Asnjë arrestim nuk është bërë deri më tani.

“Burri thuhet se po përpiqej të ndihmonte disa rosa që ishin në një kryqëzim”, ka thënë Departamenti i Policisë Rocklin në një deklaratë.

“Ndërsa burri ishte në kryqëzim, një shofer adoleshent ishte nisur drejt lindjes në bulevardin Stanford Ranch. Ky shofer i mitur goditi këmbësorin që ishte në rrugë”.

Një dëshmitare, Summer Peterson, tha për një degë lokale të CBS News, fëmijët e saj ishin dëshmitarë të përplasjes, e cila ndodhi të enjten në mbrëmje rreth orës 20:15 me kohën lokale.

“Ata po thoshin ‘Oh, është shumë e lezetshme. Është shumë mirë prej tij’. Dhe pastaj krejt papritur ai u godit nga një makinë”, tha ajo.

Një mbledhje fondesh në internet e krijuar nga të afërmit thotë se Rivara po i çonte fëmijët e tij në shtëpi pas praktikës së tyre të notit, kur ata vunë re një “mama rosë dhe rosat që përpiqeshin të kalonin një kryqëzim”. /Telegrafi/