Larja me ujë të njelmët është në modë, por a është një ide e mirë? Çfarë thonë dermatologët

Në rrjetin social “TikTok”, përdoruesit popullarizojnë përdorimin e ujit të ngrohtë me kripë për të hequr aknet dhe për të reduktuar skuqjen

Kur mendoni për ujin e njelmët, me siguri fillimisht do të mendoni shtrirjen në plazh dhe dëfrimin në det. Por, falë rrjetit social “TikTok”, uji i njelmët është bërë popullor për qëllime të kujdesit dhe bukurisë.

Në këtë rrjet përdoruesit thonë se larja me ujë të njelmët është e mirë për eliminimin e akneve dhe zbutjen e skuqjeve të lëkurës, transmeton Telegrafi.

Si e përdorin përdoruesit e “TikTok”-ut ujin e njelmët për qëllime bukurie?

Në shumicën e rasteve, ato bashkojnë ujin e zakonshëm të ngrohtë nga rubineti, të cilin e derdhin në një shishe me spërkatës dhe shtojnë kripën e zakonshme të tryezës ose kripën e detit. Masën e aplikojnë në fytyrë, e lënë të thahet dhe më pas e lajnë fytyrën me ujë të thjeshtë.

Dermatologët, natyrisht, kanë dhënë fjalën e tyre për këtë trend. Nga njëra anë, ata paralajmërojnë se kripa mund të thajë lëkurën dhe të kërcënojë barrierën e saj, dhe nga ana tjetër, ata nuk e kundërshtojnë se uji i kripur mund të jetë i dobishëm për eliminimin e yndyrës së tepërt ose zbutjen e ndryshimeve të shkaktuara nga psoriaza.

Dr. Marisa Garshick, dermatologe nga Nju-Jorku, thotë për “Byrdie” që larja me ujë të njelmët mund të ndihmojë në reduktimin e tepricës së yndyrës dhe kjo do të ishte e dobishme për personat të cilët kanë lëkurë të yndyrshme.

– Uji i njelmët mund të ndikojë si një piling mekanik dhe të kontribuojë që lëkura të jetë më e shndritshme dhe më e lëmuar – thotë dr. Garshick. Mirëpo, ajo paralajmëron që përdormi i ujit të njelmët mund të shkaktojë acarime te njerëzit që kanë lëkurë më të ndjeshme ose të thatë.

Dermatologë të tjerë thotë se nuk do ta provonin kurrë efektin e kombinimit të ujit të ngrohtë të çezmës dhe kripës. /Telegrafi/