Aeroporti i Rinasit me gardh rrethues, ndahen përgjegjësitë e sigurisë në mes privatëve dhe shtetit

Gardhi i Aeroportit të Rinasit, edhe pse në territor shqiptar, ndan përgjegjësinë për sigurinë mes shtetit dhe një kompanie private. Brenda tij shtrihet aeroporti dhe çdo gjë që ndodh aty është përgjegjësi e një kompanie private të quajtur “ICTS”, ndërsa jashtë është Policia e Shtetit që përgjigjet.

Gjashtë ditë pas supergrabitjes nuk është marrë ende asnjë masë shtesë sigurie, përveç atyre të policisë, e cila ka ngritur postblloqe. Agjentë të “ICTS”-së janë shfaqur gjatë ditës në aeroport për të riparë parametrat e sigurisë.

“Pjesa e brendshme ende nuk ka bërë një kërkesë mbështetjeje sipas Kodit ajror, sipas të cilit duhet të paraqesë disa masa shtesë, duke kërkuar edhe policinë që të jetë e pranishme. Siç e shikoni janë edhe grupet e Forcave të Ndërhyrjes së Shpejtë, që po sigurojnë portën nga ku nisi ngjarja e ndodhur, pasi elementët janë po ata që kanë qenë edhe ditën e ngjarjes, të pandryshuar. Po ashtu edhe në një tjetër pikë hyrëse”, tha Ermal Milori, shef i Komisariatit të Rinasit.

Sipas të dhënave të prokurorisë, grabitësit e kanë kryer goditjen aq të qetë sa kanë pasur kohë jo vetëm për të këputur çelësin e portës, por edhe për t’i vendosur asaj një barrierë që të mos mbyllej në kthim. Por përveç elementëve të sigurisë, çfarë tjetër nuk funksionoi gjatë atyre 3 minutave të grabitjes?

“Ne njoftimin e kemi marrë nga Operatori i Menaxhimit të Aeroportit. Ndërkohë që duhet ta kishim marrë drejtpërdrejt nga ICTS-ja për ngjarje kriminale. ICTS-ja duhej të kishte njoftuar menjëherë që kishte thyerje të perimetrit të aeroportit”, tha më tej Ermal Milori.

Shefi i Komisariatit të Rinasit lë të hapur mundësinë për ndryshimin e kushteve të sigurisë së aeroportit, raporton Top Channel, përcjellë Klan Kosova.

“Unë mund të them vetëm që do të kërkohet dhe duhet të ndryshojnë”, deklaroi Milori.

Në përpjekje për të zbardhur rrëmbimin e 960 mijë eurove, prokuroria i ka dërguar urdhërsekuestrimi të dokumentacionit bankës, të cilës iu grabit valuta monetare, si dhe kompanisë “Nazeri”, e cila siguronte transportimin e tyre./Telegrafi/