“Ma bëri rezervimin dhe nuk më la të paguaja darkën” – Jorginho flet për veprimin e Xhakës dhe zënkat që kishte në të kaluarën

Jorginho ka zbuluar se Granit Xhaka nuk e ka lënë ta paguaj një darkë, menjëherë pasi nënshkroi për Topçinjtë, pavarësisht marrëdhënieve të ftohta më parë mes dyshes.

Italiani përfundoi kalimin në Emirates Stadium për 15 milionë euro nga Chelsea. Ai tashmë ka shijuar një ndikim pozitiv në Londrën Veriore, derisa ndihmoi Topçinjtë të fitojnë në ndeshjen e fundit ndaj Aston Villas.

I pyetur nëse ishte i lumtur që tani do të ishte bashkëlojtar me mesfushorin shqiptar me pasaportë zvicerane, Jorginho kishte një përgjigje të thjeshtë dhe vlerësoi natyrën e mirë të Xhakës jashtë fushës.

Lexo po ashtu Xhaka tregon formulën e suksesit të Arsenalit në Ligën Premier

Duke folur për beIN Sports, italiani tha: “Po, jam i lumtur. Ne patëm disa zënka në fushë më parë (me Xhakën), por jashtë fushës, ai është një djalë vërtet i mirë”.

“Po, jashtë fushës (Xhaka është ndryshe). E pyeta një ditë tjetër se ku mund të dilja për darkë dhe ai më rezervoi dhe nuk më la të paguaj gjithashtu. Isha si ‘Ok, faleminderit shumë’ (qesh)”.

Lexo po ashtu Bëhet viral fjalimi i Granit Xhakës para derbit me Tottenhamin – një lider i lindur

“Pra, po, ai është një djalë vërtet, vërtet i mirë dhe jam i lumtur që mund ta shoh këtë pjesë tjetër të tij”, ka shtuar më tej mesfushori.

Jorginho dhe Xhaka me siguri do të shpresojnë të fitojnë titullin e Ligës Premier në këtë sezon, pasi aktualisht Arsenali është lider me 52 pikë, dy më shumë se Manchester City që është në vendin e dytë. /Telegrafi/