Publikohet fotografi e Adem Demaçit me Albin Kurtin gjatë kohës së luftës

Lëvizja Vetëvendosje ka publikuar një fotografi historike nga viti 1998, ku shfaqet kryeministri aktual i Kosovës, Albin Kurti, në një moment të rëndësishëm të angazhimit të tij gjatë luftës për çlirimin e vendit.

Në këtë imazh, Kurti shihet teksa futet në një veturë, ndërsa përreth tij ndodhen disa ushtarë të Ushtrisë Çlirimtare të Kosovës (UÇK), të cilët asokohe ishin në vijën e parë të rezistencës kundër regjimit serb.

Pjesë e kësaj skene është edhe veprimtari i njohur Adem Demaçi, figurë qendrore e rezistencës kombëtare dhe drejtues i zyrës së UÇK-së në Prishtinë.

Në atë kohë, Albin Kurti punonte në këtë zyrë dhe kishte një rol të rëndësishëm në komunikimin dhe organizimin politik të rezistencës. Demaçi, i njohur si “Mandela i Ballkanit”, ishte një nga mbështetësit kryesorë të UÇK-së dhe një zë i fuqishëm për të drejtat e shqiptarëve në Kosovë.

“Përgjithmonë UÇK”, shkruan Lëvizja Vetëvendosje në llogarinë zyrtare në Facebook.

Fotografia sjell në kujtesë një epokë të rëndësishme të historisë së Kosovës, duke rikujtuar sakrificat dhe angazhimin e atyre që kontribuuan në luftën për liri dhe pavarësi.

Ky postim mund të shihet si një reflektim mbi trashëgiminë e UÇK-së dhe ndikimin e saj në rrjedhën politike të vendit.

Fotografia është shkrepur nga Ridvan Slivova në Llapashticë./Telegrafi/