Haxhiu: Janë ngritur 67 aktakuza kundrejt 174 personave për krime lufte

Ministrja e Drejtësisë, Albulena Haxhiu, ka theksuar përkushtimin e Qeverisë për ndërtimin e një procesi të qëndrueshëm dhe gjithëpërfshirës, që ka si objektiv zbardhjen e krimeve të luftës të kryera nga Serbia dhe ofrimin e drejtësisë për viktimat.

Në një konferencë për media, Haxhiu theksoi se janë bërë hapa të rëndësishëm në këtë drejtim, duke u fokusuar në institucionalizimin e kujtesës kolektive dhe ruajtjen e dëshmive të krimeve të luftës.

“Gjatë kësaj periudhe qeverisëse kemi ndërmarr veprime të shumta dhe janë bërë hapa të rëndësishëm për të ndërtuar themelet e një procesi të qëndrueshëm dhe gjithëpërfshirës që synon të zbardh të vërtetën e krimeve të luftës të kryera nga Serbia në Kosovë dhe të ofrojë drejtësi për viktimën. Në këtë drejtim për katër vite me radhë ne kemi punuar me përkushtim të plotë për të institucionalizuar kujtesën kolektive dhe për të siguruar që dëshmitë e krimeve të luftës të ruhen dhe të ju transmetohen brezave të ardhshëm. Sot mund të them që kemi shënuar rezultate të rëndësishme dhe të prekshme. Fillimisht kemi themeluar dhe funksionalizuar Institutin për krimet e kryera gjatë luftës në Kosovë”, ka thënë Haxhiu.

Ministrja Haxhiu theksoi gjithashtu se tani është e mundur të ndiqen penalisht ata që përpiqen të shmangin përgjegjësinë për krimet që kanë kryer, pavarësisht vendndodhjes së tyre.

Ajo përmendi shifrat konkrete që përforcojnë këtë angazhim: “Bazuar në të dhënat nga Prokuroria Speciale dhe Departamenti për Krime Lufte, janë ngritur 67 aktakuza në 62 raste, ndaj 174 personave. Për 10 raste, gjyqet po zhvillohen në mungesë, dhe ky numër pritet të rritet”

Ministrja Haxhiu theksoi se ky angazhim është një mesazh i qartë: “Kosova nuk do të dorëzohet kurrë përballë mohimeve dhe manipulimeve që synojnë të zbehin të vërtetën. Drejtësia do të triumfojë”, tha ajo.

Ndërkaq, Ministri i Kulturës për Rini dhe Sport, Hajrulla Çeku, theksoi se, përveç përpjekjeve për drejtësi, qeveria ka ndërmarrë veprime për dokumentimin dhe prezantimin e krimeve të luftës.

“Në këtë drejtim tashmë jemi në fazën e hartimit të mastërplanit, të projektit të madh të kompleksit memorial ‘Adem Jashari’, në Prekaz, e cila ka për synim shndërrimin e gjithë asaj hapësire në një muze të hapur ku dokumentohet njëra ndër betejat më të lavdishme e luftës së UÇK-së, ‘Epopeja e UÇK-së’ “. /Telegrafi/