Scholz e Macron të gatshëm të bashkëpunojnë me rebelët sirianë pas rrëzimit të Assadit

Kancelari gjerman Olaf Scholz dhe presidenti francez Emannuel Macron, janë të përgatitur të punojnë me grupet rebele siriane që rrëzuan presidentin Bashar al-Assad me kushte të caktuara.

Udhëheqësit e dy fuqive më të mëdha të Bashkimit Evropian mirëpritën largimin e Assadit, i cili i kishte shkaktuar “vuajtje të tmerrshme popullit sirian dhe dëme të mëdha në vendin e tij”, transmeton Telegrafi.

Udhëheqësi sirian u largua nga Damasku për në Moskë të dielën, duke i dhënë fund më shumë se 50 viteve të sundimit brutal nga familja e tij.

“(Scholz dhe Macron) ranë dakord se ata janë të përgatitur të punonin së bashku me sundimtarët e rinj mbi bazën e të drejtave themelore të njeriut dhe mbrojtjen e pakicave etnike dhe fetare”, thuhet në deklaratën e qeverisë gjermane të publikuar të hënën vonë.

Deklarata erdhi ndërsa qeveritë në mbarë botën po përpiqen të krijojnë lidhje të reja me fraksionin kryesor rebel të Sirisë, Hayat Tahrir al-Sham (HTS), një grup më parë aleat me Al Kaedën dhe që është cilësuar një organizatë terroriste nga SHBA, Bashkimi Evropian, Turqia dhe Kombet e Bashkuara.

“Scholz dhe Macron ranë dakord të punojnë së bashku për të forcuar angazhimin e BE-së në Siri, duke përfshirë mbështetjen për një proces politik gjithëpërfshirës në Siri, dhe do të diskutojnë rrugën përpara në koordinim të ngushtë me partnerët në Lindjen e Mesme”, thuhet në deklaratë. /Telegrafi/